BAKI,VOA, Orxan Qədirzadə
Türkiyənin enerji siyasətində yeni mərhələnin başlaya biləcəyi ilə bağlı mühüm açıqlama verilib.
VOA xəbər verir ki, Türkiyənin Enerji və Təbii Sərvətlər naziri Alparslan Bayraktar “təəccübləndirəcək bir anlaşma üzərində işlədiklərini” bəyan edərək ölkənin enerji strategiyasında dönüş nöqtəsinə işarə edib.
Nazir bildirib ki, hazırda Türkiyə üç əsas istiqamət üzrə fəaliyyətini intensivləşdirir: artan enerji tələbatının qarşılanması, idxaldan asılılığın azaldılması və 2053-cü il üçün nəzərdə tutulan sıfır emissiya hədəflərinə çatmaq. Bu kontekstdə enerji səmərəliliyi əsas prioritet kimi müəyyən edilib.
Elektrikləşmə əsas strateji xətt kimi
Bayraktar qeyd edib ki, dünyada baş verən texnoloji dəyişikliklər, xüsusilə elektrikli nəqliyyatın yayılması Türkiyəni “elektrikləşən iqtisadiyyat” modelinə keçməyə vadar edir. Onun sözlərinə görə, ölkənin yeni enerji arxitekturasının mərkəzində məhz elektrikləşmə dayanır.
Bu çərçivədə yenilənə bilən enerji mənbələrinin genişləndirilməsi, elektrik ötürmə infrastrukturlarının gücləndirilməsi və enerji şəbəkələrinin modernləşdirilməsi istiqamətində milyardlarla dollar investisiya planlaşdırılır.
Regional enerji layihələri genişlənir
Nazir həmçinin Türkiyənin regional enerji əlaqələrini genişləndirmək niyyətində olduğunu vurğulayıb. İraq neftinin Türkiyə üzərindən dünya bazarına çıxarılması, Qətər qazının region vasitəsilə Avropaya ötürülməsi və Orta Asiya qazının Xəzər üzərindən daşınması kimi layihələr gündəmdədir.
Eyni zamanda, Türkiyə Petrollarının xaricdə fəaliyyətinin genişləndirilməsi planlaşdırılır. Somali, Liviya, Pakistan və Orta Asiya regionlarında yeni layihələr üzərində iş aparılır.
Hürmüz böhranının iqtisadi təsiri
Bayraktar bildirib ki, Hürmüz boğazında yaranan gərginlik Türkiyə iqtisadiyyatına ciddi maliyyə yükü yaradır. Hesablamalara görə, enerji qiymətlərinin artması nəticəsində ölkəyə əlavə milyardlarla dollar xərc düşə bilər.
“Sürpriz anlaşma” hansı sahəni əhatə edir?
Nazir detalları açıqlamasa da, böyük enerji şirkətləri ilə əməkdaşlıq danışıqlarının aparıldığını qeyd edib. Xüsusilə beynəlxalq enerji nəhəngləri ilə yeni müqavilələrin imzalanmasının gözlənildiyi bildirilir.
Ekspertlər hesab edir ki, bu anlaşma Türkiyənin enerji müstəqilliyini gücləndirməklə yanaşı, onu regionda əsas enerji qovşaqlarından birinə çevirə bilər.
