BAKI,VOA Orxan Qədirzadə

Türkiyədə Böyük Birlik Partiyasının (BBP) qurucu sədri Muhsin Yazıcıoğlunun və daha beş nəfərin həlak olduğu helikopter qəzası ilə bağlı FETÖ terror təşkilatına dair aparılan istintaq çərçivəsində 19 şübhəli həbs edilib.

Ankara Respublika Baş Prokurorluğunun apardığı istintaq çərçivəsində saxlanılan 27 şübhəlidən 19-u barəsində həbs qətimkan tədbiri seçilib, daha 8 nəfər isə məhkəmə nəzarəti şərti ilə sərbəst buraxılıb.

Türkiyənin ədliyyə naziri Akın Gürlek bildirib ki, istintaq çərçivəsində ölkənin 30 müxtəlif ünvanında əməliyyat keçirilib və ümumilikdə 25 nəfər ədliyyə orqanlarına təhvil verilib.

İstintaq zamanı ümumilikdə 29 şübhəlinin müəyyən edildiyi, onların silahlı terror təşkilatı yaratmaq, idarə etmək və üzv olmaqla yanaşı, əvvəlcədən planlaşdırılmış qəsdən adam öldürmə cinayətini törətməkdə şübhəli bilindiyi qeyd olunub.

Bununla da uzun illər qəza və ya səhlənkarlıq ehtimalı üzərində aparılan araşdırmada ilk dəfə rəsmi olaraq hadisənin qəsdən törədilmiş qətl və sui-qəsd kimi qiymətləndirildiyi bildirilib.

İstintaq materiallarına daxil edilən sübutlar arasında FETÖ üzvlərinin istifadə etdiyi "ByLock" proqramından əldə olunan yazışmaların da yer aldığı qeyd edilir.

Həmin yazışmalarda hadisə ilə bağlı "Yağdan tük çəkirmiş kimi iş həll olundu" məzmunlu ifadənin yer aldığı bildirilir. İstintaq bu yazışmaları araşdırılan iş üzrə mühüm sübutlardan biri kimi qiymətləndirir.

Araşdırmalar zamanı 2009-cu il martın 5-də Kahramanmaraş vilayətində baş vermiş hadisə ilə bağlı yeni faktlar da müəyyən edilib.

İstintaqın əldə etdiyi məlumatlara əsasən, helikopterin qəzaya uğradığı vaxt hadisə bölgəsində üç hərbi təyyarə olub.

Araşdırma çərçivəsində F-4 tipli hərbi təyyarələrdən birinin müəyyən müddət ərzində radar ekranlarından itdiyi və bu müddətdə hündürlüyünü azaltdığı müəyyən edilib.

İstintaq orqanları hadisənin bütün təfərrüatlarının araşdırılması istiqamətində əməliyyat-istintaq tədbirlərinin davam etdirildiyini bildiriblər.