BAKI,VOA Orxan Qədirzadə
Türkiyədə dövlət qurumlarının internet saytlarında şəxsi məlumatların açıq şəkildə paylaşılması ilə bağlı yeni qaydalar qüvvəyə minib. Müvafiq qərar Türkiyənin Şəxsi Məlumatların Qorunması Qurumu (KVKK) tərəfindən qəbul edilərək Rəsmi Qəzetdə dərc olunub.
Qərara əsasən, dövlət qurumları bundan sonra imtahan nəticələri, püşkatma siyahıları, təyinatlar və digər elanlarda vətəndaşların şəxsi məlumatlarını hər kəs üçün açıq şəkildə yayımlaya bilməyəcək.
Yeni tənzimləməyə görə, nəticələr yalnız e-Devlet və ya digər təhlükəsiz elektron sistemlər vasitəsilə aidiyyəti şəxslərin istifadəsinə təqdim ediləcək.
KVKK bildirib ki, qərar dövlət qurumları, bələdiyyələr, vilayət xüsusi idarələri, universitetlər və digər hüquqi şəxs statusuna malik dövlət qurumlarının internet resurslarında yerləşdirilən şəxsi məlumatlarla bağlı aparılan araşdırmaların nəticəsi əsasında qəbul olunub.
Qurumun açıqlamasında vurğulanıb ki, 6698 saylı Şəxsi Məlumatların Qorunması haqqında Qanuna əsasən, şəxsi məlumatların əldə olunmasından onların silinməsinə qədər həyata keçirilən bütün əməliyyatlar məlumatların emalı hesab edilir və qanunvericiliyin tələblərinə uyğun aparılmalıdır.
Araşdırmalar zamanı müəyyən edilib ki, bəzi dövlət qurumlarının internet səhifələrində müxtəlif sənədlərdə vətəndaşların ad və soyadı, ata və ana adı, yaşı, Türkiyə şəxsiyyət vəsiqəsinin (T.C.) nömrəsi, ünvanı, mobil telefon nömrəsi, doğum yeri, peşəsi, ixtisası, vəzifəsi, xidmət stajı, şəxsi nömrəsi, çalışdığı bölmə, hərbi xidmət vəziyyəti, təhsil məlumatları və digər şəxsi məlumatları açıq şəkildə dərc olunub.
Bundan əlavə, imtahan prosesləri ilə bağlı müraciət nömrəsi, KPSS balı, qəbul və ya imtina qərarı, uğurlu və ya uğursuz nəticələr, düzgün və səhv cavabların sayı, yekun bal, müraciət edilən vəzifə, namizəd və tələbə nömrələri, imtahanda iştirak etməmə səbəbi, əsas və ehtiyat siyahıları, natamam sənədlər barədə məlumatlar, eləcə də digər şəxsi məlumatların da internetdə yayımlandığı müəyyən olunub.
Yeni qərarla dövlət qurumlarının yalnız zəruri hüquqi əsas olduqda şəxsi məlumatları açıqlaya biləcəyi, digər hallarda isə məlumatların məxfiliyinin qorunmasının təmin edilməli olduğu bildirilib.
