BAKI,VOA, Fərid Mikayılov
Suriyanın xarici işlər naziri Əsəd Həsən Şeybani avqustun 6-da Türkiyəyə işgüzar səfər edəcək.
VOA xəbər verir ki, xarici işlər naziri Hakan Fidan ilə keçiriləcək görüşdə Suriyada sabitliyin və təhlükəsizliyin təmin olunması istiqamətində görülən işlər geniş müzakirə ediləcək.
Məlumata əsasən, tərəflər terrorla mübarizə sahəsində əməkdaşlığın gücləndirilməsi, Suriyanın şimal-şərqinin mərkəzi hökumətə inteqrasiyası və Dəməşqin təhlükəsizlik potensialının artırılması məsələlərini nəzərdən keçirəcəklər.
Görüşdə, həmçinin 2024-cü ilin dekabrından etibarən iqtisadiyyat, təhlükəsizlik və ictimai barışıq sahələrində əldə olunan nəticələr qiymətləndiriləcək. İkitərəfli münasibətlərin institusional əsasda inkişafı, Suriya Xalq Məclisinin fəaliyyətə başlaması fonunda parlamentlərarası əməkdaşlıq və qarşıdakı yüksək səviyyəli səfərlər də gündəmdə olacaq.
Regional məsələlər də danışıqların əsas mövzularından biri olacaq. Türkiyə tərəfi İsrailin Suriyadakı hərəkətlərini qəbuledilməz hesab etdiyini vurğulayacaq, Qəzza zolağında hərbi əməliyyatların dayandırılmasının və İsrail qoşunlarının Livandan çıxmasının regional təhlükəsizlik baxımından əhəmiyyətini diqqətə çatdıracaq.
Görüş zamanı Hakan Fidanın Türkiyənin ABŞ və İran arasında atəşkəsin qorunması, Hörmüz boğazında gəmiçiliyin bərpası və Yaxın Şərqdə davamlı sülhün təmin olunması istiqamətində aparılan diplomatik təşəbbüslərə verdiyi dəstəyi də suriyalı həmkarına çatdıracağı gözlənilir.
