BAKI,VOA Orxan Qədirzadə
Türkiyə Prezidenti Rəcəb Tayyib Ərdoğan hakim Ədalət və İnkişaf Partiyasının (AK Parti) Mərkəzi Qərar və İdarəetmə Şurasının (MKYK) iclasında "Terrorsuz Türkiyə" prosesi ilə bağlı ictimaiyyətin düzgün məlumatlandırılması və dezinformasiyanın qarşısının alınması üçün partiya təşkilatlarına tapşırıqlar verib.
Türkiyə mətbuatının yaydığı məlumata görə, Ərdoğan prosesin vətəndaşlara ətraflı izah edilməsinin vacibliyini vurğulayaraq, yanlış məlumatların yayılmasına imkan verilməməsini istəyib.
Məlumata əsasən, sentyabr ayından etibarən AK Parti-nin təşkilatları ölkənin 81 vilayətində və bütün rayonlarında geniş maarifləndirmə kampaniyasına başlayacaq. Partiya üzvləri "Terrorsuz Türkiyə" konsepsiyasının milli təhlükəsizlik, ictimai həmrəylik və regional sabitlik baxımından əhəmiyyətini vətəndaşlara izah edəcəklər.
Bildirilib ki, kampaniya çərçivəsində hazırlanmış qanun layihəsinin ümumi amnistiya nəzərdə tutmadığı, heç bir şəxsə xüsusi status verilmədiyi və ağır cinayətlərin bu tənzimləmənin əhatə dairəsinə daxil edilmədiyi xüsusilə vurğulanacaq.
Məlumata görə, "Milli Həmrəylik və İctimai Bütövlüyün Gücləndirilməsi haqqında" qanun layihəsi qəbul edildikdən sonra təhlükəsizlik qurumları PKK üzvlərinin silahları təhvil verməsi, sığınacaqların boşaldılması və bütün logistika vasitələrinin təslim edilməsi üçün təxminən 1,5–2 aylıq müddət nəzərdə tutur.
İddia olunur ki, PKK lideri Abdullah Öcalanın yaxın vaxtlarda təşkilat üzvlərinə silahları təhvil vermələri və Türkiyəyə qayıtmaları ilə bağlı çağırış edəcəyi, təşkilatın Kandildəki rəhbərliyinin isə yaxın günlərdə mövqelərin boşaldılması barədə açıqlama verəcəyi gözlənilir.
Məlumata əsasən, silahların təhvil verilməsi sentyabrın sonunadək başa çatarsa və bu barədə Türkiyənin Milli Təhlükəsizlik Şurası (MGK) müvafiq qərar qəbul edərsə, qanunun icrasına oktyabr ayından başlanıla bilər.
Xəbərdə qeyd olunur ki, Türkiyə Milli Kəşfiyyat Təşkilatı (MİT) və digər aidiyyəti qurumlar İraqın mərkəzi hökuməti, İraq Kürd Regional Rəhbərliyi və Suriya ilə silahların hansı məntəqələrdə və necə təhvil veriləcəyinə dair koordinasiya aparır. İraqdakı PKK üzvlərinin Ərbil və Süleymaniyədə yaradılmış xüsusi mərkəzlərdə silahlarını təhvil verməsinin planlaşdırıldığı bildirilir.
Bundan əlavə, təşkilatın arsenalındakı pilotsuz uçuş aparatları, paramotorlar və peyk rabitə sistemlərinin də səlahiyyətli qurumlara təhvil veriləcəyi qeyd olunur.
Məlumata görə, qanundan yararlanan şəxslər barəsində cəzanın icrasının təxirə salınması qərarı verilsə də, onlar xüsusi monitorinq mexanizmi vasitəsilə nəzarətdə saxlanılacaq. Yeni cinayət törədilməsi və ya terror fəaliyyəti ilə yenidən əlaqə qurulması halında cəzanın təxirə salınması qərarı ləğv ediləcək və hökm icra olunacaq.
Təhlükəsizlik mənbələrinin qiymətləndirməsinə görə, PKK-nın yüksək rəhbərliyinə daxil olan təxminən 180–200 nəfər və daha 1 000-ə yaxın təşkilat üzvü bu hüquqi mexanizmdən yararlana bilməyəcək. Buna görə də Murat Karayılan, Cemil Bayık, Duran Kalkan, Fehman Hüseyn (Bahoz Erdal) və Bese Hozat kimi təşkilat rəhbərlərinin bu prosesin əhatə dairəsinə daxil edilməyəcəyi bildirilir.
Həmçinin qeyd olunur ki, silahların tam təhvil verilməsi barədə Milli Təhlükəsizlik Şurasının qərarı Rəsmi Qəzetdə dərc edildikdən sonra terror təşkilatına üzvlük, terror təşkilatına yardım, terror təbliğatı və terrorun maliyyələşdirilməsi ilə bağlı cinayətlərə görə həbsdə olan şəxslərin işlərinə yenidən baxılacaq. Ağırlaşdırılmış ömürlük həbs cəzası alanlar və qəsdən adam öldürmə cinayətinə görə məhkum edilənlər bu mexanizmdən yararlana bilməyəcəklər. Digər şəxslər üzrə isə qərarlar onların hüquqi vəziyyətinə uyğun olaraq qəbul ediləcək.
