BAKI,VOA, Fərid Mikayılov
Türkiyənin xarici işlər naziri Hakan Fidan avqustun 13-14-də Misirə rəsmi səfər edəcək. Səfər çərçivəsində Türkiyə-Misir münasibətləri ilə yanaşı, Qəzza, Hörmüz boğazı, Suriya, Liviya, Sudan və Şərqi Aralıq dənizindəki vəziyyət müzakirə olunacaq.
VOA xəbər verir ki, Türkiyə Xarici İşlər Nazirliyinin məlumatına görə, Fidanın səfəri zamanı Misir Prezidenti Əbdülfəttah əs-Sisi tərəfindən qəbul ediləcəyi və ölkənin yüksəkvəzifəli rəsmiləri ilə görüşlər keçirəcəyi gözlənilir.
Səfər çərçivəsində Hakan Fidan və Misirin xarici işlər naziri Bədr Əbdül Ati arasında Türkiyə-Misir Birgə Planlaşdırma Qrupunun ikinci iclası keçiriləcək. Görüşdə iki ölkə liderlərinin fevralın 4-də Qahirədə keçirdiyi Yüksək Səviyyəli Strateji Əməkdaşlıq Şurasının ikinci toplantısının nəticələri və 2028-ci ildə Türkiyədə keçirilməsi nəzərdə tutulan üçüncü toplantıya hazırlıq məsələləri müzakirə olunacaq.
İqtisadi və müdafiə əməkdaşlığı
Fidanın görüşlərində Türkiyə-Misir münasibətlərinin siyasi, iqtisadi, ticarət və hərbi istiqamətləri üzrə əməkdaşlığın genişləndirilməsi məsələlərinin müzakirəsi gözlənilir.
Tərəflərin ikitərəfli ticarət dövriyyəsinin 15 milyard dollara çatdırılması hədəfini, qarşılıqlı investisiyaların təşviqini və iş dünyası arasında əlaqələrin gücləndirilməsini nəzərdən keçirəcəyi bildirilir.
Nəqliyyat, enerji və regional bağlantılar da müzakirələrin əsas istiqamətlərindən olacaq. Hidrokarbon ehtiyatları, elektrik şəbəkələrinin inteqrasiyası, enerji infrastrukturu və mədənçilik sahələrində əməkdaşlıq imkanlarının qiymətləndirilməsi nəzərdə tutulur.
Bundan əlavə, Türkiyə ilə Misir arasında hərbi və müdafiə sənayesi sahəsində mövcud əməkdaşlığın daha da inkişaf etdirilməsi üçün mümkün addımlar müzakirə ediləcək.
Qəzza və Hörmüz boğazı əsas gündəmdə
Fidanın regional məsələlərlə bağlı görüşlərində ABŞ və İran arasında atəşkəsin yenidən təmin edilməsi və Hörmüz boğazının mümkün qədər tez açılması istiqamətində diplomatik səylərin də müzakirə olunacağı gözlənilir.
Qəzzadakı vəziyyət də görüşlərin əsas mövzularından olacaq. Türkiyə tərəfinin bölgədə hücumların dayandırılmasının, atəşkəsin tam icrasının və humanitar yardımların fasiləsiz şəkildə çatdırılmasının vacibliyini vurğulaması gözlənilir.
Fidanın Qəzza Sülh Planının ikinci mərhələsinin həyata keçirilməsi ilə bağlı fikir mübadiləsi aparacağı, həmçinin İsrailin Fələstinlə yanaşı, Livan və Suriyaya yönəlmiş hərəkətlərinin regional təhlükəsizliyə təsirlərini müzakirə edəcəyi bildirilir.
Suriya, Liviya və Sudan
Görüşlərdə Suriyanın ərazi bütövlüyü və siyasi birliyi əsasında davamlı sabitliyin təmin edilməsi istiqamətində səylər də nəzərdən keçiriləcək.
Liviya ilə bağlı Ankara və Qahirənin ölkənin ərazi bütövlüyü və siyasi birliyinin qorunmasına əsaslanan yanaşmalarının müzakirə ediləcəyi gözlənilir.
Şərqi Aralıq dənizində sabitliyin və regional əməkdaşlığın gücləndirilməsi, eləcə də Sudanın suverenliyi, birliyi və ərazi bütövlüyünün qorunması məsələləri də Fidanın gündəliyində yer alacaq.
Türkiyə-Misir əlaqələri güclənir
Son illərdə Türkiyə ilə Misir arasında yüksək səviyyəli qarşılıqlı səfərlərin və siyasi təmasların intensivləşməsi ikitərəfli münasibətlərə yeni dinamika qazandırıb.
2025-ci ildə iki ölkə arasında ticarət dövriyyəsi 8 milyard dollar səviyyəsində olub. Ankara və Qahirə bu göstəricinin növbəti mərhələdə 15 milyard dollara çatdırılmasını hədəfləyir.
Türkiyənin Misirdəki investisiyalarının ümumi dəyəri 4 milyard dolları ötüb. Türkiyə sərmayəli şirkətlərin isə Misirdə təxminən 100 min nəfərin məşğulluğuna töhfə verdiyi bildirilir.
Türkiyə-Misir Birgə Planlaşdırma Qrupu isə iki ölkə arasında 2024-cü ildə Yüksək Səviyyəli Strateji Əməkdaşlıq Şurasının yaradılması ilə bağlı imzalanmış birgə bəyanat əsasında formalaşdırılıb. Qrupun əsas məqsədi strateji əməkdaşlıq şurasının toplantılarına hazırlıq aparmaq və ikitərəfli əməkdaşlığın müxtəlif istiqamətləri üzrə koordinasiyanı gücləndirməkdir.
