BAKI,VOA, Fərid Mikayılov
Türkiyə ABŞ-nin Suriyanı terrorizmi dəstəkləyən ölkələr siyahısından çıxarmaq barədə qərarını alqışlayıb. Ankara bu addımın Suriyanın iqtisadi dirçəlişi və yenidən qurulması qarşısındakı əsas maneələrdən birinin aradan qaldırılmasına imkan verəcəyini bildirib.
VOA xəbər verir ki, Türkiyə Xarici İşlər Nazirliyinin yaydığı açıqlamada ABŞ administrasiyasının bu istiqamətdə göstərdiyi iradə və ABŞ Konqresinin prosesə verdiyi dəstək yüksək qiymətləndirilib. Nazirlik həmçinin Suriya hökumətini və xalqını nümayiş etdirdikləri qətiyyətli mövqeyə görə təbrik edib.
Türkiyə XİN bildirib ki, Ankaranın uzun müddətdir dəstəklədiyi bu addım Suriyanın iqtisadi baxımdan bərpası və ölkənin yenidən qurulması qarşısındakı ən böyük maneələrdən birini aradan qaldırır.
Açıqlamada qərarın Suriyanın beynəlxalq ictimaiyyətlə əlaqələrinin gücləndirilməsinə, eləcə də ölkədə təhlükəsizlik və sabitliyin davamlı şəkildə təmin olunması istiqamətində səylərə əlavə təkan verəcəyinə ümid ifadə olunub.
Türkiyə tərəfi beynəlxalq ictimaiyyəti də firavan və sabit Suriyanın qurulması məqsədi ətrafında səylərini birləşdirməyə çağırıb.
Nazirlik eyni zamanda bu məqsədə təhlükə yaradan təcavüzkar addımların dayandırılması üçün beynəlxalq ictimaiyyətin üzərinə düşən məsuliyyəti yerinə yetirməsinin vacibliyini vurğulayıb.
Ankaranın mövqeyinə görə, Suriyanın terrorizmi dəstəkləyən ölkələr siyahısından çıxarılması ölkənin beynəlxalq iqtisadi və siyasi əlaqələrinin genişləndirilməsi, xarici sərmayələrin cəlb edilməsi və yenidənqurma prosesinin sürətləndirilməsi baxımından mühüm əhəmiyyət daşıyır.
