BAKI, VOA Orxan Qədirzadə
Türkiyənin Cümhuriyyət Xalq Partiyasının (CHP) sözçüsü və Yerli İdarəetmələrdən məsul rəhbər müavini Müslim Sarı Ankara Böyükşəhər Bələdiyyəsinin sədri Mansur Yavaşla bağlı müzakirələrə aydınlıq gətirib.
Sarı bildirib ki, Yavaş CHP rəhbərliyinə partiyanın çətiri altında siyasi fəaliyyətini davam etdirmək istədiyini çatdırıb. Onun sözlərinə görə, CHP rəhbərliyi ilə Yavaş arasında hər hansı soyuqluq və ya problem yoxdur.
“Mansur bəy CHP çərçivəsində siyasətə davam etmək istədiyini söylədi”, – deyə Sarı qeyd edib.
CHP rəsmisi Yavaşın Ankara Böyükşəhər Bələdiyyə Məclisindəki həssas siyasi tarazlıqları nəzərə aldığını və partiya rəhbərliyinin ondan xüsusi siyasi addım atmasını tələb etmədiyini bildirib.
Sarı həmçinin CHP-nin xarici siyasət və milli təhlükəsizlik məsələlərində yeni mövqeyinin partiyanın Cümhur İttifaqına qoşulacağı anlamına gəlmədiyini vurğulayıb.
İstanbul Böyükşəhər Bələdiyyəsində mümkün seçkilərə də toxunan Sarı CHP-nin əsas prinsipinin partiyadan seçilmiş bələdiyyələrin CHP-də qalması olduğunu deyib. O, bələdiyyə sədrləri və məclis üzvlərini birlik və bütövlüyü qorumağa çağırıb.
