BAKI, AzerVoice Analitik Təhlil Mərkəzi – Hizbullah Siyasi Şurasının üzvü və sabiq nazir Mahmud Qamati ABŞ-ın Livandakı “müqavimət silahı”na son qoyulması çağırışlarına cavab olaraq bildirib ki, belə bir addım ölkənin məhv olması ilə nəticələnə bilər.
Qamati bu fikri partiyanın Beyrutdakı “İmam Müctəba” kompleksində təşkil etdiyi anım mərasimində səsləndirib. Onun sözlərinə görə, “region üçün hazırlanan plan çox təhlükəlidir və Livanı yalnız milli birlik xilas edə bilər.”
ABŞ-ın Suriyaya xüsusi elçisi Tomas Barak daha əvvəl bəyan etmişdi ki, əgər Livan hökuməti silahların yalnız dövlətin nəzarətində olmasını təmin etməsə, ölkə Suriyanın təsir dairəsinə salına bilər.
Hizbullah: “Silahımız bizim gücümüz və Livanın dayağıdır”
“Biz heç bir dövlətin qolu deyilik. Biz bu vətənin silahı, gücü və dayağıyıq. Silahımızdan imtina etsək, bu Livanın süqutu deməkdir.”-deyə, Qamati bildirib.
Bu açıqlama Livan cəmiyyətində və siyasi dairələrdə geniş müzakirəyə səbəb olub. Çünki ölkənin ciddi iqtisadi və sosial böhran yaşadığı bir dönəmdə, Hizbullahın silahlı statusunun davam etməsi xarici investisiya və beynəlxalq dəstəyə maneə kimi görülür.
Livan cəmiyyətində bölünmə davam edir
ABŞ rəsmisinin açıqlaması bir çox livanlının dövlətin tam suverenliyinin təmin olunması və silahların yalnız rəsmi orqanlarda toplanması tələbini dəstəklədiyini göstərib. Bu, həm də ölkənin beynəlxalq dəstək və investisiyalara çıxışının açarı kimi qiymətləndirilir.
Lakin Hizbullah tərəfdarları bunu Livanı zəiflətmək və İsrailin maraqlarına xidmət kimi qiymətləndirir. Partiya, silahların ləğvini “İsrailə xidmət” və “regiondakı müqavimət xəttini zəiflətmək” cəhdi kimi təqdim edir.
Vaşinqtonun alternativ planı: Livanı yenidən Suriyanın təsirinə salmaq?
Tomas Barakın bəyanatı Livanın Suriyaya yenidən bağlı vəziyyətə gətirilə biləcəyi ehtimalını gündəmə gətirib. Bu isə Livan cəmiyyətində narahatlıq doğurur, çünki ölkə onillərlə Suriya rejiminin nəzarətində olub və bu keçmişin təkrarlanması istənilmir.
Müşahidəçilər hesab edirlər ki, ABŞ Livanın rəsmi qurumlarının acizliyi fonunda Hizbullahın təsirini zəiflətmək üçün bu təhdid vasitəsilə təzyiqi artırmaq istəyir. Vaşinqton artıq Livan liderlərinin vaxt udmaq siyasətindən narahatdır və konkret nəticələr gözləyir.
Hizbullahın müqavimət silahını “Livanın varlığının əsas şərti” kimi təqdim etməsi ölkədəki dövlətçilik prinsipinə qarşı çıxmaq kimi dəyərləndirilir. Beynəlxalq ictimaiyyət və ABŞ isə Livanın xilası üçün silahların yalnız dövlətin əlində cəmlənməsini tələb edir.
Lakin görünən odur ki, Hizbullah bu istiqamətdə heç bir geri addım atmaq niyyətində deyil – istər daxili təzyiqlər, istərsə də xarici təhdidlər qarşısında.
