BAKI,VOA Analitik Təhlil Mərkəzi, Orxan Qədirzadə

Donald Trampın İranla iki həftəlik atəşkəs elan etməsi regionda hərbi gərginliyi müvəqqəti dondursa da, İsrailin Baş naziri Benyamin Netanyahu üçün həm daxili, həm də xarici siyasətdə yeni və olduqca mürəkkəb bir mərhələnin başlanğıcı hesab olunur.

Analitiklər hesab edirlər ki, 40 günlük müharibənin bu nöqtədə dayanması Netanyahunun siyasi karyerası üçün "sonun başlanğıcı" ola bilər.

Ekspertlər bildirirlər ki, atəşkəs Netanyahunun böyük ümidlər bəslədiyi hərbi strategiyasının iflası deməkdir:

Netanyahu bu müharibəni özünün yenidən seçilməsi üçün bir tramplin kimi görürdü. Lakin İranın son ana qədər raket zərbələrini davam etdirməsi və sisteminin çökməməsi İsrail daxilində "qələbə" hissini zəiflədib.

Netanyahunun Trampı daha uzunmüddətli müharibəyə razı sala bilməməsi onun Vaşinqton üzərindəki təsir imkanlarının azaldığını göstərir. "New York Times"ın yazdığına görə, Netanyahu Trampa yerinə yetirilməsi çətin olan vədlər verərək onu bu münaqişəyə cəlb edib.

Netanyahunun Beynəlxalq Cinayət Məhkəməsi tərəfindən axtarışda olması və daxili müxalifətin güclənməsi onu küncə sıxır.

Livan cəbhəsi və "Yarımçıq Qələbə"

Netanyahu atəşkəsin Livana şamil edilmədiyini desə də, Livan cəbhəsində "Hizbullah"ın göstərdiyi gözlənilməz müqavimət İsrail ictimaiyyətində şok yaradıb. Hətta cənubda bufer zonası yaradılsa belə, bu, Netanyahunun seçicilərini razı salmaq üçün yetərli olmaya bilər.

Ekspertlərin fikrincə, İranın atəşkəs elanından sonra İsrailin mərkəzi bölgələrinə və Dimona kimi strateji nöqtələrinə endirdiyi zərbələr bir neçə məqsəd güdür:

Tehran göstərmək istəyir ki, 40 günlük bombardmanlara baxmayaraq, sistem hələ də vahid mərkəzdən idarə olunur və ordunun döyüş qabiliyyəti yerindədir.

Atəşkəs masasına "məğlub tərəf" kimi deyil, "son zərbəni vuran tərəf" kimi oturmaq.

Həm İran daxilində, həm də regiondakı müttəfiqlərinə müqavimətin davam etdiyi mesajını vermək.