BAKI, AzerVoice
İspaniyanın "Real Madrid" futbol klubunun sabiq baş məşqçisi, italiyalı Karlo Ançelotti vergi ödəməkdən yayındığına görə bir il müddətinə azadlıqdan məhrum edilib.
AzerVoice xəbər verir ki, bu barədə qərarı Madrid Ali Məhkəməsi çıxarıb.
İspaniya qanunvericiliyinə görə, iki ilə qədər azadlıqdan məhrumetmə cəzaları çox vaxt şərti hesab olunur.
“Məhkəmə Karlo Ançelottini 2014-cü il üzrə vergi dövründə yol verdiyi cinayətə görə bir il müddətinə azadlıqdan məhrum edir və onu 2015-ci il üzrə vergi dövrü ilə bağlı ittihamlardan bəraət etdirir” – deyə, sənəddə qeyd olunub.
Qeyd edək ki, Ançelottiyə qarşı məhkəmə prosesi 2 aprel tarixində başlayıb. Prokurorluq iddia edib ki, Ançelotti 2014 və 2015-ci illərdə yalnız “Real Madrid” klubundakı əmək haqqısı üzrə vergi ödəyib, lakin əlavə gəlirləri üzrə bu öhdəliyi yerinə yetirməyib. Ümumi borcun məbləği 1 milyon 62 min avro təşkil edib.
Məlumat üçün bildirək ki ki, Ançelotti "Real Madrid" klubuna 2013–2015-ci illərdə rəhbərlik edib və 2021-ci ildə yenidən kluba qayıdıb. O, klubla birlikdə iki dəfə İspaniya çempionluğu, kuboku və Superkuboku, klublararası dünya çempionluğu, üç dəfə UEFA Çempionlar Liqası və UEFA Superkuboku qazanıb. Karlo Ançelotti Avropanın beş ən güclü milli çempionatında qalib gəlmiş ilk baş məşqçidir. O, həmçinin UEFA Çempionlar Liqasında baş məşqçi kimi ən çox titul qazanan şəxsdir.
2025-ci ilin may ayında Ançelotti “Real” klubundan ayrılıb və Braziliya milli komandasının baş məşqçisi təyin olunub. 66 yaşlı mütəxəssislə imzalanan müqavilə 2026-cı ildə keçiriləcək dünya çempionatının sonuna qədər qüvvədədir.
