BAKI,VOA
Azərbaycan Respublikasının Medianın İnkişafı Agentliyi ölkədə müxtəlif icmaların və milli azlıqların adından çıxış edərək media fəaliyyəti göstərən informasiya resursları ilə bağlı bəyanat yayıb. Agentlik bütün media subyektlərinin qanunvericiliyin tələblərinə əməl etməli olduğunu bildirib.
VOA xəbər verir ki, bəyanatda Azərbaycan ərazisində media fəaliyyəti həyata keçirən bütün subyektlərin “Media haqqında” Azərbaycan Respublikası Qanununun tələblərinə riayət etməsinin və qanunvericiliklə müəyyən edilmiş qaydada “Media Reyestri” İnformasiya Sistemində mövcud olmasının vacibliyi vurğulanıb.
Agentlik özünü Azərbaycan Yəhudi Media Mərkəzinin və yəhudi əsilli ictimai xadimlərin təşəbbüsü ilə yaradılmış informasiya portalı kimi təqdim edən “Ajmedia.news” saytının “Media Reyestri” İnformasiya Sistemində mövcud olmadığını açıqlayıb.
Bəyanatda, həmçinin saytın yayımladığı materiallarda media etikası tələblərinə riayət etmədiyi bildirilib. Agentlik “Media haqqında” Qanunun tələblərinin pozulması ilə əlaqədar sözügedən informasiya resursu barədə məhkəmə tərəfindən müvafiq qərarın qəbul edildiyini qeyd edib.
Medianın İnkişafı Agentliyinin məlumatına görə, məhkəmə qərarı ilə “Ajmedia.news” saytının fəaliyyəti qanunsuz hesab edilib.
Agentlik vurğulayıb ki, hər hansı icmanın və ya sosial qrupun adından çıxış edərək media fəaliyyəti həyata keçirən subyektlər də qanunvericiliyin tələblərinə ciddi şəkildə əməl etməlidirlər.
Bəyanatda belə media subyektlərinin hüquqi və peşəkar statusları, fəaliyyət istiqamətləri və təmsilçilik xüsusiyyətləri barədə ictimaiyyətə düzgün, obyektiv və şəffaf məlumat verməsinin vacibliyi xüsusi qeyd olunub.
