BAKI,VOA,Yusif Şərifzadə
Şotlandiyada Donald Trampa məxsus qolf meydançasına ziyan vurmaqda ittiham olunan “Palestine Action” hərəkatının yeddi fəalının terrorçuluqla bağlı qanunvericilik əsasında cəzalandırılması məsələsi mübahisələrə səbəb olub. “Defend Our Juries” fəal qrupu prokurorluğun bu istiqamətdəki addımını sərt tənqid edib.
VOA xəbər verir ki, yeddi fəal mart ayında Trampa məxsus Törnböri qolf meydançasında Fələstinə dəstək məqsədilə keçirilən etiraz aksiyasından sonra saxlanılıb. Etirazçılar Qəzza əhalisinin məcburi köçürülməsi ilə bağlı planlara qarşı çıxaraq qolf meydançasına boya ilə ziyan vurmaqda ittiham olunurlar.
İş üzrə ilk məhkəmə iclasının bazar ertəsi Qlazqoda Ali Məhkəmədə keçirilməsi nəzərdə tutulur. Fəalların hansı hüquqi müddəalar əsasında mühakimə olunacağı məsələsi diqqət mərkəzindədir.
“Defend Our Juries” təşkilatı ABŞ-nin “Palestine Action” hərəkatını beynəlxalq terror təşkilatı kimi tanıması ilə Trampın qolf meydançasında keçirilən etiraz arasında əlaqə olduğunu iddia edib. Təşkilat bu qərarın siyasi xarakter daşıdığını bildirir.
Qrupun nümayəndələri Donald Trampın siyasətini də sərt şəkildə tənqid edərək, “Palestine Action” fəallarına münasibətin demokratiya və qanunun aliliyi baxımından ciddi suallar yaratdığını bildiriblər.
Təşkilat Şotlandiyada aparılan hüquqi prosesin yalnız yeddi fəalın taleyi ilə məhdudlaşmadığını, etiraz hüququ və terrorçuluqla mübarizə qanunlarının tətbiq sərhədləri baxımından da əhəmiyyət daşıdığını vurğulayıb.
