BAKI, AzerVoice, Səməd Əyyubov
İngiltərənin “Vest Hem” klubunun braziliyalı yarımmüdafiəçisi Lukas Paketa mərc oyunları ilə bağlı qayda pozuntuları işində təqsirsiz sayılıb.
AzerVoice xəbər verir ki, bu barədə klubun mətbuat xidməti məlumat yayıb.
Qeyd edək ki, daha əvvəl İngiltərə Futbol Assosiasiyası futbolçunun günahı sübuta yetiriləcəyi təqdirdə onun futboldan ömürlük uzaqlaşdırılmasını tövsiyə etmişdi. Paketa, 2022-ci il noyabrın 12-də “Lester”lə, 2023-cü il martın 12-də “Aston Villa” ilə, mayın 21-də “Lids”lə və avqustun 12-də “Bornmut”la oyunlarda qəsdən sarı vərəqə aldığına görə şübhəli bilinirdi.
27 yaşlı Paketa 2022-ci ildən Londonda çıxış edir. Ötən mövsüm o, müxtəlif turnirlərdə 36 oyuna çıxaraq 5 qol vurub. 2022-2023 mövsümündə “Vest Hem”in Konfrans Liqasını qazanmasında mühüm rol oynayıb. Bundan əvvəl futbolçu Fransanın “Lion”, İtaliyanın “Milan” və Braziliyanın “Flamenqo” klublarında çıxış edib.
Braziliya millisində 55 oyuna çıxan Paketa 11 qol vurub. O, milli komandada Amerika Kubokunun qalibi (2019) və turnirin gümüş medalçısı (2021) olub.
