BAKI,AzerVoice, Fərid Mikayılov
Barselona klubunun prezidenti Xuan Laporta və rəhbərliyi, yenilənmiş Kamp Nou stadionuna dönüş tarixinin dəfələrlə təxirə salınması səbəbilə ciddi təzyiqlə üzləşib.
AzerVoice xəbər verir ki, klub rəhbərliyi növbəti dəfə özünün müəyyən etdiyi son tarixə də əməl etməyib və bu, həm üzvlərin, həm də ictimaiyyətin narazılığına səbəb olub.
Stadionun yenidən istifadəyə verilməsi üçün əvvəlcə 2024-cü ilin noyabrı – klubun 125 illiyi, daha sonra 2025-ci ilin əvvəli və nəhayət, yazda keçiriləcək “El Clasico” qarşılaşması planlaşdırılmışdı. Lakin bu tarixlərin heç biri reallaşmayıb. Klub rəhbərliyi indi La Liqa çərçivəsində sentyabrın 21-də Xetafe ilə keçiriləcək oyuna qədər lazımi sənədlərin təmin olunmadığını etiraf edir.
Klubun vitse-prezidenti Elena Fort əvvəllər “fəlakət olmazsa stadion hazır olacaq” açıqlamasını versə də, indi sənədləşmənin vaxtında təqdim edilmədiyini etiraf edib.
Keçmiş prezidentliyə namizəd Víctor Font rəhbərliyi “aldadıcı siyasət aparmaqda” günahlandıraraq, “səhvlər ola bilər, amma azarkeşləri və üzvləri aldatmaq qəbuledilməzdir” deyib.
Prezidentliyə namizədliyini açıqlayan Joan Camprubi Montal isə tikinti layihələrinin idarə edilməsini “uğursuzluq” adlandırıb və təxirəsalmalar səbəbilə 300 milyon avro ödəniş məsələsinin hələ də açıq qaldığını vurğulayıb: “Laporta bu suallara cavab verməlidir.”
Sabiq direktor Xavi Vilajoana isə stadionun vaxtında hazır olmasının mümkünsüz olduğunu bildirərək, rəhbərliyi üzvlərin ümidləri ilə oynamaqda ittiham edib.
Kamp Nounun hazırkı qeyri-müəyyənliyi fonunda Barselona bu həftəsonu Valensia ilə oyunu Estadi İohan Kroyff stadionunda keçirəcək. Eyni arenanın bir həftə sonra Xetafe ilə matça da ev sahibliyi etməsi planlaşdırılır.
