BAKI, AzerVoice, Fərid Mikayılov
İngiltərənin Mançester Yunayted klubu tarixi stadionu Old Trafford üçün 2 milyard funt-sterlinq (təxminən 2,7 milyard dollar) dəyərində yenidənqurma layihəsini təqdim edib.
AzerVoice xəbər verir ki, klub rəhbərliyi “Şimalın Vembli”si adlandırılan bu möhtəşəm arenanın 100 min tamaşaçı tutumuna malik olacağını bildirib.
Layihəni hazırlayan dünyaca məşhur memar, 90 yaşlı Lord Norman Foster bu işin onun üçün “həyatının layihəsi” olduğunu deyib. Mançester şəhərində böyüyən Foster, “Qırmızı Şeytanlar”ın azarkeşlərinin inanılmaz dəstəyini vurğulayıb.
“Azarkeş bazası möhtəşəmdir. Bu, ruhlandırıcı bir layihədir və onun arxasında təbii olaraq çox şey qurula bilər” — deyə o bildirib.
Foster yeni stadionu Böyük Britaniyada bənzəri olmayan bir arena kimi təsvir edib.
2025-ci ilin martında ictimaiyyətə açıqlanan planlarda stadionun üzərini çətir kimi örtəcək üç nəhəng dirək, həmçinin kommersiya və əyləncə obyektlərinin yerləşəcəyi kompleks nəzərdə tutulur. Tikinti təxminən beş ilə başa çatacaq.
Fosterin portfelində Londonun məşhur “Gherkin” binası, Millennium körpüsü və Britaniya Muzeyinin Böyük Qalereyası kimi simvolik layihələr də var. O, eyni zamanda Kraliça II Yelizavetanın xatirəsinə ucaldılacaq milli abidənin memarıdır.
