BAKI,AzerVoice, Fərid Mikayılov
Nottinqem Forestin yeni baş məşqçisi Ange Postecoglou, klubun son yüz ildəki ən uğursuz startına imza ataraq arzuolunmaz bir rekorda düşüb.
AzerVoice xəbər verir ki, avstraliyalı mütəxəssis, sentyabrın 9-da vəzifəyə başladığı vaxtdan bəri komandanın başında keçirdiyi ilk altı oyunun heç birində qələbə qazana bilməyib.
Son uğursuzluq Avropa Liqasındakı Midtulyand qarşılaşmasında (2:3) qeydə alınıb. 29 ildən sonra ilk dəfə Avrokubok oyununu City Groundda keçirən Forest, fanatlarının böyük ümidinə baxmayaraq meydanı məğlub tərk edib. Oyunda Midtulyand standart vəziyyətlərdən iki dəfə qapını dəqiq nişan alaraq fərqlənib, əlavə olunmuş dəqiqələrdə Kris Voodun penalti qolu isə yalnız təsəlli xarakteri daşıyıb.
Postecoglounun rəhbərliyi altında Forest Premyer Liqada Arsenala 0:3 hesabı ilə uduzub, Liqa Kubokunda isə 2:0 öndə olduğu halda Suonsi qarşısında dramatik şəkildə ələnib. Komanda yalnız Börnli (1:1) və Betis (1:1) qarşılaşmalarında xal toplaya bilib. Sanderlend (0:1) və Midtulyand məğlubiyyətləri isə azarkeşlərin səbr kasasını daşırıb.
Bu nəticələrlə Postecoglou, 1925-ci ildə John Baynes-dən sonra Nottinqem Forest tarixində ilk altı oyununda qələbə qazana bilməyən ilk baş məşqçi olub. Hətta ev oyununda azarkeşlər “Səhər işdən çıxacaqsan” şüarları səsləndirərək narazılıqlarını açıq şəkildə ifadə ediblər.
Forest Postecoglou dönəmində altı oyunda ümumilikdə 13 qol buraxıb və aprel ayından bəri qapısını toxunulmaz saxlaya bilməyib. Komanda qarşıdakı həftəsonu Premyer Liqada Nyukasl səfərinə yollanacaq.
