BAKI, AzerVoice, Fərid Mikayılov
İngiltərənin Mançester Yunayted klubu Almaniyanın Borussiya Dortmund komandasının gənc yarımmüdafiəçisi Jobe Bellinqemi transfer etmək niyyətindədir.
AzerVoice xəbər verir ki, klubun baş məşqçisi Ruben Amorim futbolçunun özünün tətbiq etdiyi 3-4-2-1 taktiki sisteminə uyğun oyunçu olduğunu hesab edir.
Gənc yarımmüdafiəçi ötən mövsüm Sanderlend klubunda parlaq çıxışı ilə diqqət çəkmiş, komandasına Premyer Liqaya yüksəlməkdə mühüm rol oynamışdı. Bu uğurun ardından Borussiya Dortmund onun transferi üçün 33 milyon avro ödəyərək futbolçunu heyətinə cəlb edib.
Lakin Jobe Bellinqemın Almaniyadakı debüt mövsümü gözlənildiyi kimi alınmayıb. O, cari mövsümdə bütün turnirlərdə cəmi 8 oyunda 281 dəqiqə meydanda olub və hələ ki, nə qol vurub, nə də ötürmə verib. Bellinqem yalnız üç dəfə start heyətində yer alıb.
Baş məşqçi Ruben Amorim Bellinqemin fiziki hazırlığını və meydan mərkəzində çoxşaxəli oynamaq bacarığını komanda üçün dəyərli hesab edir.
Bununla yanaşı, gənc futbolçuya Kristal Pelas klubunun da maraq göstərdiyi bildirilir. London təmsilçisi gələn yay əsas yarımmüdafiəçisi Adam Uortonun Real Madridə keçid ehtimalını nəzərə alaraq, artıq onun əvəzləyicisini axtarmağa başlayıb.
Sentyabrda ardıcıl uğursuz nəticələr yaşayan və liqa cədvəlində 14-cü yerə qədər geriləyən Mançester Yunayted, milli komandalar fasiləsindən öncə Sanderlend üzərində qələbə qazanaraq özünəinamı bərpa edib.
Komanda növbəti qarşılaşmada Liverpulla Anfilddə üz-üzə gələcək. Liverpulun son üç oyunda məğlubiyyət alması Amorimin komandasına vacib qələbə üçün real imkan yaradır.
