Bakı. AzerVoice:

Daha öncə Türkiyə ilə Azərbaycan arasında imzalanan saziş Türkiyə prezidenti tərəfindən təsdiq olunub.

AzerVoice xəbər verir ki, bununla bağlı fərman Türkiyənin "Resmi Qezete"ində dərc olunub.

Fərmanla 2022-ci il dekabrın 22-də imzalanmış “Azərbaycan Respublikası Hökuməti ilə Türkiyə Respublikası Hökuməti arasında tikinti işləri sahəsində əməkdaşlığa dair Protokol” qüvvəyə minib. Azərbaycan Prezidenti İlham Əliyev tərəfindən isə sənəd 2023-cü il martın 18-də təsdiq olunub.

Azərbaycan və Türkiyə xalqları arasında mövcud olan dostluq münasibətlərini gücləndirməyi və tikinti işləri sahəsində əməkdaşlığı artırmağı arzu edərək, hazırkı və gələcək nəsillərin rifahı naminə tikinti işlərinin təkmilləşdirilməsində davamlı inkişaf yanaşmasının izlənilməsinin əhəmiyyətini dərk edərək bu protokol hazırlanmışdır.

Bu əməkdaşlığın məqədi iki ölkənin tikinti işləri sahəsində dayanıqlılığı təmin etmək üçün ədalətlilik, səmərəlilik və qarşılıqlılıq prinsipləri əsasında bilik, təcrübə və texnologiyalar mübadiləsinin təmin edilməsidir.

Əməkdaşlıq protokolunda tərəflər arasında tikintiyə nəzarət sahəsində bilik və təcrübə mübadiləsinin həyata keçirilməsi, Elektron Beton İzləmə Sistemi (EBİS) ilə əlaqədar Azərbaycan Respublikasında tənzimləmənin hazırlanması və sistemin qurulması, zəlzələ, sel və digər təbii fəlakət hallarında tikililərin və dağılmış infrastrukturun zərərinin müəyyənləşdirilməsi kimi məsələlər öz əksini tapmışdır.

Qeyd edək ki, Azərbaycan Respublikasında Elektron Beton İzləmə Sisteminin (EBİS) qurulması bu Protokol qüvvəyə mindikdən sonra 1 (bir) il ərzində tamamlanacaqdır.