BAKI, AzerVoice

2–3 dekabr 2025-ci il tarixlərində Azərbaycan Karbon Bazarı üzrə Vorkşop Bakı Fond Birjası (BFB), Böyük Britaniyanın Bakıdakı Səfirliyi və TheCityUK tərəfindən birgə təşkil olunaraq BFB-də keçirilib.

AzerVoice xəbər verir ki, iki gün davam edən vorkşopun məqsədi Azərbaycan karbon bazarının inkişafını dəstəkləmək, könüllü karbon bazarları (VCM-lər) üzrə institusional bilik və anlayışı artırmaq, həmçinin Azərbaycan karbon bazarının qlobal karbon bazarları ilə gələcəkdə qarşılıqlı əlaqələndirilməsi imkanlarını araşdırmaq olub.

Açılış nitqləri BFB-nin İdarə Heyətinin sədri Ruslan Xəlilov, Böyük Britaniyanın Azərbaycandakı səfiri cənab Fergus Auld OBE və TheCityUK təşkilatının Beynəlxalq İnkişaf üzrə direktoru Anna Rogers tərəfindən səsləndirilib. Sessiyalara isə ITMO Ltd şirkətinin həmtəsisçisi, komplayens karbon bazarları, Paris Sazişi və 6-cı maddə üzrə dünyanın aparıcı ekspertlərindən biri olan cənab Maykl Matres rəhbərlik edib.

Açılış zamanı Böyük Britaniyanın Azərbaycandakı səfiri, cənab Fergus Auld OBE bildirib:
"Böyük Britaniya hökuməti üçün iqtisadi artımın təmin edilməsi prioritetdir. Buna görə də Britaniyanın Bakıdakı Səfirliyi, Böyük Britaniya–Azərbaycan Strateji Tərəfdaşlığının bir hissəsi olaraq Azərbaycanın iqtisadi şaxələndirilməsini dəstəkləyən tərəfdaşlıqları davam etdirir.
Böyük Britaniyanın Bakıdakı Səfirliyi, TheCityUK və Bakı Fond Birjası tərəfindən birgə təşkil olunan bu vorkşop, Böyük Britaniya–Azərbaycan kommersiya tərəfdaşlığının dekarbonizasiya, enerji keçidi və davamlı inkişaf üzrə ortaq maraqları irəli aparmaq potensialını nümayiş etdirir."

İki gün ərzində iştirakçılara karbon bazarlarının əsasları — karbon vergiləri və emissiyaların ticarəti sxemləri kimi karbon qiymətləndirmə mexanizmləri, həmçinin komplayens karbon bazarlarının (Böyük Britaniya və Aİ ETS), könüllü karbon bazarlarının strukturu və fəaliyyəti, eləcə də Paris Sazişi çərçivəsində əsas beynəlxalq mexanizmlər təqdim olunub.

İştirakçılar həmçinin milli ekoloji, fiskal və maliyyə qanunvericiliyi ilə uyğunlaşdırma, nəzarət mexanizmləri, risklərin idarə edilməsi, fırıldaqçılığa qarşı tədbirlər və Böyük Britaniyanın tənzimləmə təcrübəsi daxil olmaqla hüquqi və tənzimləyici çərçivələri müzakirə ediblər.

Sonda vorkşop karbon bazarının inkişafı üçün tələb olunan geniş ekosistemi vurğulayıb — maliyyə institutlarının, layihə inkişaf etdiricilərinin və vasitəçilərin rolu, banklaşdırıla bilən karbon layihələri üzrə portfelin formalaşdırılması, yaşıl maliyyələşdirmə alətləri vasitəsilə özəl kapitalın cəlb edilməsi, eləcə də təsdiq edən qurumlar, konsultantlar və auditorlar üzrə yerli potensialın gücləndirilməsi önə çıxarılıb.

Tədbir Azərbaycan kapital bazarı iştirakçılarının nümayəndələrini bir araya gətirərək, ölkənin qlobal karbon bazarlarına inteqrasiyası üçün tələb olunan bilik bazası və infrastrukturun formalaşdırılması istiqamətində mühüm addım olub.