BAKI, AzerVoice
1129-cu il yanvarın 13-də Fransanın Trua şəhərində keçirilən Trua Kilsə Şurası zamanı Papa Honorius II hərbi-dini təşkilat kimi tanınan Tampliyer Cəngavərlərinə rəsmi olaraq tanıdıvə onları “Tanrının ordusu” elan etdi. Fransız əsilli Hyuq de Payenin rəhbərliyi ilə Tampliyer təşkilatı 1118-ci ildə yaradılmışdı. Təşkilatın özünə qoyduğu əsas missiya Xaç yürüşləri dövründə Müqəddəs Torpaqlara gedib-gələn xristian zəvvarları qorumaq idi. Bu yürüşlər müsəlmanların nəzarətində olan Fələstin torpaqlarına qarşı aparılan hərbi ekspedisiyalardan ibarət idi.
İlk dövrlərdə Tampliyer Cəngavərlərinin sayı cəmi doqquz nəfər idi. Bunun əsas səbəbi təşkilatın son dərəcə sərt qaydaları idi. Cəngavərlər yalnız zadəgan mənşəli olmalı, yoxsulluq, itaət və iffət andı içməli idilər. 1127-ci ildə aparılan təbliğat fəaliyyəti nəticəsində bir çox zadəgan Tampliyerlərə qoşuldu və bu, təşkilatın sayının, nüfuzunun və təsir dairəsinin artmasına səbəb oldu.
XIV əsrin əvvəllərində Xaç yürüşlərinin uğursuzluqla başa çatmasından sonra Tampliyer ordeni son dərəcə varlandı. Bu zənginlik həm dini, həm də dünyəvi hakim dairələrdə qısqanclıq doğurdu. 1307-ci ildə Fransa kralı IV Filipp və Papa V Klement birləşərək Tampliyerlərə qarşı əməliyyata başladılar. Ordenin böyük ustadı Jak de Molay bidətçilik, müqəddəsliyə hörmətsizlik və satanizm ittihamları ilə həbs olundu.
İşgəncələr altında Jak de Molay və digər yüksək rütbəli Tampliyerlər ittihamları “etiraf” etdilər və sonda tonqalda yandırıldılar. 1312-ci ildə Papa V Klement Tampliyer ordeninin ləğv edildiyini rəsmən elan etdi.
Müasir dövrdə Katolik Kilsəsi Tampliyerlərə qarşı aparılan təqiblərin əsassız olduğunu etiraf edib və bildirib ki, Papa V Klement dünyəvi hakimlərin təzyiqi altında bu qərarı verməyə məcbur qalıb. Əsrlər boyu Tampliyerlərlə bağlı çoxsaylı mif və əfsanələr yaranıb. Onların Məbəd Dağında Müqəddəs Qədəh, Əhd sandığı və ya İsanın çarmıxa çəkildiyi xaçın hissələrini tapdığına dair inanclar bu günə qədər populyarlığını qoruyur.
Tampliyerlərin guya gizli sirləri bir çox kitab və filmlərə ilham verib. Bu əsərlər arasında ən məşhurlarından biri də Da Vinçi Şifrəsi romanı və onun əsasında çəkilmiş eyniadlı filmdir.
