BAKI,VOA, Orxan Qədirzadə
1429-cu ilin 29 aprelində Janna Dark Yüzillik müharibə zamanı ingilislər tərəfindən mühasirəyə alınmış Orlean şəhərinin azad olunmasında həlledici rol oynayıb.
Tarixi mənbələrə görə, cəmi 17 yaşında olan Janna Dark fransız qüvvələrinə rəhbərlik edərək şəhərə daxil olub və mühasirədə olan qoşunlara həm hərbi, həm də mənəvi dəstək göstərib. Onun rəhbərliyi altında fransız ordusu qısa müddətdə üstünlük əldə edərək 8 may 1429-cu ildə mühasirəni tamamilə yarmağa nail olub.
Bu qələbə Yüzillik müharibənin gedişində dönüş nöqtəsi kimi qiymətləndirilir və sonrakı mərhələdə fransızların bir sıra mühüm uğurlar qazanmasına zəmin yaradıb.
Janna Darkın uğurlu hərbi fəaliyyəti nəticəsində VII Karl taxta çıxaraq Fransa kralı elan olunub.
Lakin 1430-cu ildə əsir düşən Janna Dark ingilislərin nəzarətində məhkəməyə çıxarılıb, bidətçilikdə ittiham edilərək 1431-ci ildə edam olunub. Sonradan onun fəaliyyəti yenidən qiymətləndirilmiş və 1920-ci ildə Katolik Kilsəsi tərəfindən müqəddəs elan edilib.
