BAKI,VOA
ABŞ-da hər il iyunun 14-ü Bayraq Günü kimi qeyd olunur. Bu tarix 1777-ci ildə ölkənin rəsmi dövlət bayrağının qəbul edilməsi ilə bağlıdır və ABŞ tarixinin mühüm mərhələlərindən biri hesab edilir.
1777-ci il iyunun 14-də, ABŞ-ın müstəqillik uğrunda mübarizəsinin davam etdiyi dövrdə Kontinental Konqres ölkənin yeni dövlət bayrağı ilə bağlı qərar qəbul edib. Qərarda bildirilirdi ki, ABŞ bayrağı qırmızı və ağ rəngli 13 növbəli zolaqdan ibarət olmalı, mavi fon üzərində isə yeni birliyi təmsil edən 13 ağ ulduz yerləşdirilməlidir.
Sonradan “Ulduzlar və Zolaqlar” adı ilə məşhurlaşan bu bayraq ABŞ-ın müstəqillik dövründə Kontinental Ordunun istifadə etdiyi “Böyük Birlik Bayrağı” əsasında hazırlanıb. Həmin bayraqda da 13 qırmızı və ağ zolaq mövcud idi.
Tarixi rəvayətlərə görə, Filadelfiya şəhərində yaşayan dərzi Betsi Ross general Corc Vaşinqtonun müraciətindən sonra yeni bayrağın ulduz hissəsinin dizaynını hazırlayıb. Bu versiyaya əsasən, mavi fon üzərində yerləşdirilən 13 ulduz dairə formasında düzülmüşdü. Lakin tarixçilər bu hadisənin həqiqətən baş verib-vermədiyini bu günə qədər qəti şəkildə təsdiq və ya təkzib edə bilməyiblər.
ABŞ müstəqilliyini əldə etdikdən sonra ölkə ərazisinə yeni ştatların qoşulması ilə bayraqda dəyişikliklər edilməyə başlanıb. Əvvəlcə hər yeni ştat üçün həm ulduz, həm də zolaq əlavə olunurdu. Lakin bu praktika bayrağın ölçü və dizaynının mürəkkəbləşməsinə səbəb olduğundan, 1818-ci ildə Konqres yeni qanun qəbul edib.
Qanuna əsasən, bayraqdakı 13 zolaq ABŞ-ın qurucu 13 koloniyasının xatirəsini yaşatmaq məqsədilə daimi saxlanılıb. Bundan sonra yalnız ulduzların sayı artırılmağa başlanıb və hər yeni ştatın ölkəyə qoşulması bayraqda əlavə bir ulduzla əks etdirilib.
Bayraq Gününün ilk rəsmi qeyd olunması isə 1877-ci ildə, bayrağın qəbul edilməsinin 100-cü ildönümündə baş tutub. Həmin il Konqresin göstərişinə əsasən ABŞ-ın bütün dövlət binalarında milli bayraq qaldırılıb.
Sonrakı illərdə bir sıra ştatlar iyunun 14-nü ayrıca bayram kimi qeyd etməyə davam edib. Nəhayət, 1949-cu ildə ABŞ Konqresi iyunun 14-nü rəsmi olaraq Bayraq Günü elan edib və bu tarix ölkə üzrə milli əhəmiyyətli anım günü statusu qazanıb.
Hazırda ABŞ bayrağında 50 ulduz yer alır. Bu ulduzlar ölkənin 50 ştatını təmsil edir. Bayraqdakı 13 qırmızı və ağ zolaq isə ABŞ dövlətinin əsasını qoyan ilk 13 koloniyanın simvolu olaraq qalır.
İki əsrdən artıq tarixə malik “Ulduzlar və Zolaqlar” bu gün ABŞ-ın ən tanınan milli rəmzlərindən biri hesab olunur və ölkənin dövlətçilik tarixinin mühüm simvolu kimi qəbul edilir.
