BAKI, AzerVoice
Dünyada 609 min nəfəri əhatə edən yeni araşdırma göstərib ki, orta yaş dövründə və qocalıqda özünü tənha hiss etmək demensiya riskini 31 faiz artırır.
Avropa İttifaqında demensiya diaqnozu qoyulan insanların sayı 7,9 milyon nəfərə yaxındır və xəstəlik üçün hələ də tam müalicə mövcud deyil. “Nature Mental Health” jurnalında dərc edilən araşdırma həm demensiya, həm də Alzheimer xəstəliyinin tənha yaşayan insanlarda daha çox müşahidə olunduğunu təsdiqləyib.
Mütəxəssislərin sözlərinə görə, tənhalıq yaddaş itkisi,diqqətin zəifləməsi, qərar qəbuletmə çətinliyi kimi faktorları 15 faiz artırır və bu vəziyyət xüsusilə diabet və piylənmə problemi olan şəxslər üçün daha risklidir.
Aİ-də aparılan sorğular göstərir ki, insanların təxminən 35 faizi özünü ən azı bir neçə dəfə tənha hiss etdiyini bildirir. Tənhalığın ən yüksək göstəricisi İrlandiya, Lüksemburq, Bolqarıstan və Yunanıstanda qeydə alınıb.
Əvvəlki tədqiqatlar da tənhalığın insult, Parkinson xəstəliyi və digər nevroloji problemlərlə əlaqəli olduğunu göstərirdi. Yeni araşdırmanın müəllifləri bildiriblər ki, demensiya riskini azaltmaq üçün insanların nəyə görə tənha qaldığını, sosial əlaqələrdən nə dərəcədə uzaqlaşdığını araşdırmaq vacibdir.
