Bakı, AzerVoice

ABŞ-ın Yale Universitetinin alimləri tərəfindən hazırlanmış fərdiləşdirilmiş xərçəng peyvəndi, 9 böyrək xərçəngi xəstəsində şişləri tamamilə yox edib.

AzerVoice xəbər verir ki , peyvənd immun sistemini gücləndirərək xərçəng hüceyrələrini hədəf alır və sağlam toxumalara zərər vermədən onları məhv edir.

2019-cu ilin martından 2021-ci ilin sentyabrına qədər aparılan tədqiqatda iştirak edən bütün xəstələr 2023-cü ilin iyulunda üç illik nəzarət müayinəsindən keçib. Nəticələrə görə, onlarda xərçəngin geri qayıtmadığı aşkarlanıb ki, bu da mühüm elmi nailiyyətdir.

Bu yeni peyvənd, Yale Xərçəng Mərkəzi və Dana-Farber Xərçəng İnstitutu tərəfindən xüsusi olaraq hər xəstənin bioloji xüsusiyyətlərinə uyğun hazırlanıb. Onun əsas məqsədi immun sistemini xərçəng hüceyrələrini tanımağa və məhv etməyə yönəltməkdir. Tədqiqatın aparıcı alimi Dr. David Braun bildirib ki, peyvənd hər xəstənin şişinə uyğun fərdiləşdirilib və orqanizmin xərçəngə qarşı daha güclü immun reaksiyası yaratmasını təmin edib.

Böyrək xərçənginin ən ölümcül formalarından biri olan mərhələ 3 və 4 şəffaf hüceyrəli böyrək karsinoması (ccRCC), diaqnoz qoyulmuş xəstələrin 85-90 faizində ölümlə nəticələnir. Lakin yeni peyvənd residivlərin qarşısını almaqda ümidverici nəticələr göstərib. Adətən xərçəng xəstələrinin 20-50 faizində xəstəlik geri qayıdır. Ancaq bu peyvəndlə müalicə olunan 9 xəstənin heç birində xərçəng təkrarlanmayıb.

Tədqiqatın birinci mərhələsində peyvəndin təhlükəsizliyi və effektivliyi sınaqdan keçirilib. İştirakçılar ümumilikdə 7 doza peyvənd qəbul edib. Nəticələr göstərib ki, peyvənd immun sistemini gücləndirərək xərçəng hüceyrələrindəki mutasiyaların 65%-ni tanıyıb və onlara qarşı reaksiya verib..

Tədqiqatçılar peyvəndin immunoterapiya ilə və immunoterapiyasız eyni dərəcədə effektiv olduğunu və ciddi yan təsirlərə səbəb olmadığını bildiriblər. Xəstələr yalnız yüngül qripəbənzər simptomlar yaşayıb.

Bu tədqiqat fərdiləşdirilmiş xərçəng peyvəndlərinin gələcəkdə daha geniş tətbiq oluna biləcəyinə işarə edir. Hazırda ikinci mərhələ sınaqları davam edir və peyvənd immun sistemini gücləndirən Keytruda (pembrolizumab) dərmanı ilə birlikdə sınaqdan keçirilir.

Qeyd edək ki, Böyrək hüceyrəli karsinoma dünyada ən çox rast gəlinən 10 xərçəng növündən biridir. Hər il dünyada 400 000-dən çox yeni hal qeydə alınır, ABŞ-da isə bu rəqəm 80 000 civarındadır.

Siqaret çəkmək, piylənmə, yüksək qan təzyiqi və genetik faktorlar böyrək xərçəngi riskini artırır. Diaqnozun artması isə daha yaxşı skrininq üsulları və ictimaiyyətin məlumatlılığının yüksəlməsi ilə əlaqələndirilir.