Bakı,AzerVoice
ABŞ-ın Northwestern Universitetindən olan alimlər çayın dəmlənmə zamanı suda olan qurğuşun və kadmium kimi ağır metalları əhəmiyyətli dərəcədə azaltdığını müəyyən ediblər.
Araşdırma çərçivəsində müxtəlif çay növləri, çay paketləri və müxtəlif dəmləmə üsullarının suda olan ağır metalları azaltmaq təsiri araşdırılıb.
Müəyyən miqdarda ağır metal ehtiva edən su məhlulları hazırlayan tədqiqatçılar, qaynama temperaturuna yaxın istiliyə qədər qızdırdıqları məhlullara fərqli zaman aralıqlarında dəmlənmiş çay yarpaqları əlavə ediblər.
Alimlər dəmləmə prosesindən sonra məhlulda qalan ağır metal miqdarını ölçərək əvvəlki və sonrakı səviyyələri ilə müqayisə ediblər.
Araşdırma nəticəsində incə üyüdülmüş qara çay yarpaqlarının geniş səth sahəsi sayəsində ağır metal ionları ilə kimyəvi bağ quraraq suda olan metalları əhəmiyyətli dərəcədə uzaqlaşdırdığı müəyyən edilib.
Çayın dəmlənmə müddəti artdıqca suda olan ağır metal miqdarının azaldığını müşahidə edən alimlər, selülozdan hazırlanmış çay paketlərinin pambıq və neylondan olanlara nisbətən daha təsirli olduğunu vurğulayıblar.
Tədqiqat, içməli sularında ağır metalların geniş yayıldığı bölgələrdə çayın ictimai sağlamlıq üzərində müsbət təsir göstərə biləcəyini ortaya qoyub.
