BAKI,AzerVoice
Braziliyada aparılan yeni bir araşdırma ağırlıq məşqlərinin yaddaş gücünü artıraraq Alzheimer riskinə qarşı qoruyucu təsir göstərdiyini üzə çıxarıb.
Sao Paulo şəhərindəki Kampinas Universitetinin alimləri yüngül yaddaş pozuntusu olan 44 nəfəri müşahidə ediblər. Altı ay boyunca həftədə iki dəfə ağırlıq qaldıran iştirakçıların yaddaşında və beyin strukturlarında əhəmiyyətli yaxşılaşma qeydə alınarkən, fiziki fəaliyyət göstərməyən qrupda isə zehni geriləmə müşahidə edilib.
Araşdırma nəticələri ağırlıq məşqlərinin Alzheimer xəstəliyi ilə əlaqəli olan hipokampus və precuneus bölgələrində kiçilmənin qarşısını aldığını göstərib.
“Fiziki inkişaf gözlənilən bir nəticə idi, lakin idmanın zehni funksiyalara da bu qədər təsir etməsi bizi sevindirdi. Tədqiqatımız ağırlıq qaldırmanın demansa qarşı güclü bir qoruma təmin etdiyini göstərir,” – deyə araşdırmanın əsas müəllifi İsadora Ribeiro, bildirib.
Alimlər uzunmüddətli ağırlıq məşqlərinin demans üzərindəki təsirlərini daha dərindən araşdırmaq üçün əlavə tədqiqatların aparılmasının vacibliyini vurğulayırlar.
“Bəzi iştirakçılar tədqiqatın sonunda artıq yüngül yaddaş pozuntusu diaqnozuna sahib deyildilər. Daha uzunmüddətli məşq proqramlarının demansın inkişafını gecikdirə və ya tamamilə qarşısını ala biləcəyini düşünürük”- deyə Ribeiro bildirib.
