BAKI,AzerVoice, Fərid Mikayılov
Elm adamları viruslara qarşı geniş təsirli yeni müalicə üsulu üzərində mühüm addım atıb. Columbia Universitetindən pediatrik immunologiya professoru Dusan Boqunoviçin rəhbərlik etdiyi qrup, nadir genetik mutasiyadan ilhamlanaraq təcrübəvi antiviral dərman hazırlayıb.
Müalicə burun damcısı formasında tətbiq edilir və orqanizmdə qısa müddətli, lakin güclü immun cavab yaradaraq virusların çoxalmasının qarşısını ala bilir. Heyvanlar üzərində aparılan sınaqlarda preparat həm qrip, həm də SARS-CoV-2-yə qarşı təsirli olub.
Professor Boqunoviç açıqlamasında qeyd edib ki, kəşf gözlənilməz şəkildə əldə olunub.
“Əslində biz antiviral müalicə axtarmırdıq. Nadir xəstələr üzərində aparılan araşdırmalar bizi universal antiviral hazırlamaq fikrinə gətirdi”- deyə o bildirib.
Elm adamlarının müşahidələrinə görə, ISG15 proteini olmayan şəxslər bakteriyalara qarşı zəif müdafiəyə malik olsalar da, viruslara qarşı yüksək müqavimət göstərirlər. Bu mexanizmi təqlid edən tədqiqatçılar xüsusi mRNA molekulları daşıyan lipid nano hissəciklər hazırlayıblar.
Mütəxəssislər bildirirlər ki, preparat məhdud miqdarda protein istehsalını stimullaşdıraraq güclü, amma zərərsiz immun aktivləşmə yaradır. Bu xüsusiyyət onu iltihab riski olmadan effektiv edir.
Hazırda alimlər müalicənin insanlar üzərində sınaqdan keçirilməsi istiqamətində çalışır. Əgər nəticələr uğurlu olsa, bu üsul COVID-19 peyvəndlərindən sonra genetik müalicə sahəsində yeni bir mərhələ açacaq.
