BAKI,VOA, Nailə Babazadə
ABŞ Prezidenti Trampın İranın enerji infrastrukturuna hücum planını 5 gün müddətinə təxirə saldığını açıqlamasından dərhal sonra, İsrail ordusu paytaxt Tehrana qarşı yeni bir hərbi əməliyyat başladığını duyurub.
VOA xəbər verir ki, Vaşinqtonun hücumları müvəqqəti dayandırmaq qərarına baxmayaraq, İsrail tərəfi Tehranın strateji nöqtələrini hədəf almağa davam edir. Paytaxtın müxtəlif ərazilərindən partlayış səsləri eşidilir və hava hücumundan müdafiə sistemlərinin aktivləşdiyi bildirilir. İsrail rəsmiləri bu hücumların "təhlükəsizlik təhdidləri tamamilə aradan qaldırılana qədər" davam edəcəyini vurğulayıblar.
Xatırladaq ki, ABŞ Prezidenti Donald Tramp, İranın enerji stansiyalarına və enerji infrastrukturuna qarşı planlaşdırılan bütün hərbi zərbələrin 5 gün müddətinə təxirə salınması barədə rəsmi göstəriş verib. Bu qərar Hörmüz boğazı ilə bağlı verilən 48 saatlıq ultimatumun başa çatmasına az qalmış açıqlanıb.
Prezidentin bu qərarı regionda gərginliyin diplomatik yolla azaldılması üçün son şans kimi qiymətləndirilir. Tramp qeyd edib ki, bu 5 günlük möhlət İran rejiminin Hörmüz boğazını beynəlxalq naviqasiya üçün tam açması və təhdidləri dayandırması üçün verilən son imkandır.
Diplomatik manevr, yoxsa fırtına qabağı səssizlik?
Hərbi analitiklər hesab edirlər ki, zərbələrin 5 gün təxirə salınması ABŞ-ın regiondakı müttəfiqləri ilə son məsləhətləşmələri aparmaq və ya İrana geri çəkilmək üçün vaxt tanımaq məqsədi daşıyır. Lakin vurğulanır ki, əgər bu müddət ərzində real addımlar atılmazsa, İranın bütün elektrik və neft infrastrukturu ən ağır zərbələrin hədəfi olacaq.
