BAKI,VOA
“Associated Press”in ABŞ rəsmilərinə istinadən verdiyi məlumata görə, Vaşinqton və Tehran arasında yeni danışıqlar raundunun keçirilməsi ilə bağlı müzakirələr aparılır. Vasitəçi ölkənin bir diplomatı bildirib ki, tərəflər artıq növbəti görüşün keçirilməsi barədə razılığa gəliblər.
ABŞ rəsmilərinin açıqlamasına görə, yeni raundun bu həftənin cümə axşamı günü baş tutması ehtimal olunur. Görüşün yeri hələlik dəqiqləşməsə də, Pakistanın paytaxtı İslamabad yenidən gündəmə gəlib. Bununla yanaşı, İsveçrənin Cenevrə şəhəri də danışıqlara ev sahibliyi edə biləcək əsas variantlardan biri kimi göstərilir.
Diplomatik mənbələr hesab edirlər ki, bu görüş tərəflər arasında gərginliyi azaltmaq və müzakirələri davam etdirmək üçün mühüm addım ola bilər.
