BAKI,VOA, Fərid Mikayılov

İran hakimiyyəti Amirali Mirjafari adlı şəxsin edam olunduğunu açıqlayıb.

VOA xəbər verir ki, rəsmi məlumata görə, o, Tehranda məscidə hücum planlaşdırmaqda və xarici qüvvələrlə əməkdaşlıqda ittiham edilərək ölüm cəzasına məhkum olunmuşdu.

İranın məhkəmə orqanları bildirir ki, hökm İran Ali Məhkəməsi tərəfindən təsdiqləndikdən sonra icra edilib. İddialara əsasən, Mirjafari dövlət təhlükəsizliyinə qarşı fəaliyyətlərdə iştirak etməkdə və xarici kəşfiyyat şəbəkələri ilə əlaqədə günahlandırılıb.

Hadisənin ölkədə sosial-iqtisadi narazılıqlar fonunda keçirilən etiraz aksiyaları zamanı baş verdiyi qeyd olunur.

Bununla yanaşı, Amnesty International başda olmaqla insan haqları qurumları İran məhkəmə sistemində etirafların təzyiq altında alınması ilə bağlı narahatlıqlarını ifadə edib.

Məlumatlara görə, BMT-nin İran üzrə xüsusi məruzəçisi Mai Sato yanvar ayında ölkədə ən azı 100 nəfərin edam edildiyini bildirib. Hüquq müdafiəçiləri isə edamların sayının daha yüksək ola biləcəyini istisna etmir.

İranın məhkəmə rəhbərliyi edam hökmlərinin daha sürətli icrasına çağırış etsə də, beynəlxalq təşkilatlar bu tendensiyanın insan haqları sahəsində vəziyyəti daha da gərginləşdirəcəyini bildirir.

Analitiklər hesab edir ki, regionda artan hərbi-siyasi gərginlik fonunda bu cür qərarlar İran daxilində və beynəlxalq müstəvidə yeni müzakirələrə səbəb olacaq.