BAKI,VOA Orxan Qədirzadə
İran Ali Rəhbərinin Ofisinin mərasimlər üzrə baş direktoru Məzahir Hüseyni İranın yeni ali rəhbəri Müctəba Xameneinin səhhəti və ABŞ-İsrail müharibəsinin ilk günündə aldığı xəsarətlərlə bağlı yeni açıqlamalar verib.
VOA xəbər verir ki, Hüseyni Tehranda keçirilən müharibə əleyhinə toplantıda çıxışı zamanı Müctəba Xameneinin bel və diz nahiyəsindən zədələr aldığını bildirib. Onun sözlərinə görə, xəsarətlərin bir hissəsi artıq sağalıb və İranın ali rəhbəri hazırda tam sağlam vəziyyətdədir.
İranın “Fars” agentliyinin yaydığı məlumata əsasən, Hüseyni 28 fevral tarixində ABŞ və İsrail tərəfindən həyata keçirildiyi iddia olunan hücumun detalları barədə də danışıb. O bildirib ki, həmin gün mərhum Əli Xameneinin ofisi və ətrafı hədəfə alınıb.
“Hadisə günü mən ofisdə idim. Düşmən bizdən təxminən 30 metr məsafədə yerləşən məntəqəni vurdu. Nəticədə general Şirazi və onunla birlikdə olan şəxslər həlak oldu”, – deyə Hüseyni qeyd edib.
Məlumata görə, zərbələrdən biri Müctəba Xameneinin dini dərslər keçdiyi binanı tamamilə dağıdıb. Lakin o, həmin vaxt binada olmayıb.
Hüseyni əlavə edib ki, daha sonra Müctəba Xameneinin yaşadığı ev də hədəfə alınıb. Hücum nəticəsində onun həyat yoldaşı Zəhra Həddad Adil həlak olub. Həmçinin Əli Xameneinin kürəkəni hesab olunan Misbah əl-Hüda Baqiri Kəni də hadisə zamanı ölüb.
İran rəsmisinin sözlərinə görə, partlayışın yaratdığı təzyiq dalğası nəticəsində Müctəba Xamenei yerə yıxılıb və bu zaman bel və dizindən xəsarətlər alıb. O qeyd edib ki, bel nahiyəsindəki problem artıq sağalıb, dizindəki zədə isə yaxın vaxtlarda tam bərpa olunacaq.
Hüseyni həmçinin Müctəba Xameneinin alnından yaralandığı barədə yayılan iddiaları təkzib edib. Onun sözlərinə görə, yalnız qulağının arxasında kiçik yara olub və həmin yara müalicə edilib.
İran rəsmisi bildirib ki, “düşmən” yeni ali rəhbərin görüntüsünü və ya səsini əldə etməyə çalışır. O vurğulayıb ki, Müctəba Xamenei uyğun zamanda ictimaiyyət qarşısına çıxacaq.
Qeyd edək ki, Müctəba Xamenei atası Əli Xameneinin müharibənin ilk günündə öldürülməsindən sonra İranın ali rəhbəri seçilib. O, vəzifəyə gəldikdən sonra ictimaiyyət qarşısında görünmədiyi üçün səhhəti ilə bağlı müxtəlif ehtimallar irəli sürülürdü.
İran Prezidenti Məsud Pezeşkian isə ötən həftə açıqlamasında Müctəba Xamenei ilə iki saat yarımlıq görüş keçirdiyini və onun fəaliyyətini davam etdirdiyini bildirib.
