BAKI,VOA,Yusif Şərifzadə

İranın xarici işlər naziri Abbas Əraqçi bildirib ki, Tehran nə ABŞ-yə tabe olacaq, nə də təhdid dilini qəbul edəcək. O, İranın milli maraqlarını müdafiə etməkdə qərarlı olduğunu vurğulayıb.

VOA xəbər verir ki, Abbas Əraqçi bu açıqlamaları Qırğızıstanda keçirilən Şanxay Əməkdaşlıq Təşkilatına üzv ölkələrin xarici işlər nazirləri şurasının iclası çərçivəsində jurnalistlərə verib. İranın Tasnim agentliyinin yaydığı məlumata görə, nazir İranın Rusiya və Çinlə məsləhətləşmələrinin davamlı xarakter daşıdığını bildirib.

Əraqçinin sözlərinə görə, Tehran hər fürsətdə Moskva və Pekinlə müntəzəm məsləhətləşmələr aparır və bu əməkdaşlıq davam edir.

İranlı nazir sülh danışıqlarının irəliləməsinə mane olan əsas amilin ABŞ-nin mövqeyi olduğunu iddia edib. O bildirib ki, danışıqlarda irəliləyişə maneə yaradan məhz Vaşinqtonun yanaşmasıdır.

Abbas Əraqçi əlavə edib ki, İranın Hörmüz boğazındakı maraqlarının qorunması ölkənin əsas prinsiplərindən biridir və Tehran bu mövqeyindən geri çəkilməyəcək.

Nazir vurğulayıb ki, İran xalqının qanuni məqsəd və tələbləri yerinə yetirilməyənədək ölkə öz maraqlarını təmin etmək istiqamətində fəaliyyətini davam etdirəcək.