BAKI,VOA, Fərid Mikayılov
İran İslam İnqilabı Keşikçiləri Korpusunun (SEPAH) media orqanı ABŞ-nin hərbi təhdidləri davam etdiyi müddətdə İranın heç bir razılaşma imzalamayacağını bəyan edib.
VOA xəbər verir ki, adı açıqlanmayan rəsmiyə istinadən yaydığı məlumata görə, Hörmüz boğazı ilə bağlı İran və Oman arasında aparılan danışıqlarda yekun razılaşmanın əldə olunmamasının əsas səbəbi ABŞ-nin müdaxiləsi və Vaşinqtonun təhdidləridir.
"ABŞ-nin müdaxiləsi və İrana qarşı hərbi hücum təhdidi davam etdiyi müddətdə razılaşma gecikəcək. İran təhdidlərin kölgəsində heç bir saziş imzalamayacaq", – deyə mənbə bildirib.
Məlumata görə, İran və ABŞ arasında daha əvvəl əldə olunmuş razılaşmanın ilkin mərhələsində Vaşinqtonun İranın dondurulmuş aktivlərini azad etməsi qarşılığında Hörmüz boğazının açılması və İranın 60 gün ərzində boğazdan keçən gəmilərdən ödəniş almaması nəzərdə tutulurdu.
Lakin İran tərəfi ABŞ-ni razılaşmanın şərtlərinə əməl etməməkdə ittiham edir. Bildirilir ki, Vaşinqton dondurulmuş aktivləri azad etməyib və Hörmüz boğazından keçid üçün Omanın ərazi sularından alternativ marşrut müəyyənləşdirib.
SEPAH-a yaxın mənbənin iddiasına görə, Tehran bunu razılaşmanın pozulması kimi qiymətləndirərək boğazdan keçidlərə məhdudiyyətlər tətbiq edib və icazəsiz keçməyə çalışan bəzi gəmiləri hədəfə alıb.
Qeyd edək ki, İran və Oman Hörmüz boğazında təhlükəsiz gəmiçilik marşrutlarının müəyyənləşdirilməsi məqsədilə danışıqları bərpa edib. İran Xarici İşlər Nazirliyinin sözçüsü İsmayıl Bəqai texniki və siyasi müzakirələrdə irəliləyiş əldə olunduğunu açıqlayıb.
