BAKI, AzerVoice
Qazaxıstan OPEC+ çərçivəsində öhdəliklərə sadiqliyini təsdiqləyib.
AzerVoice xəbər verir ki, bu barədə Qazaxıstanın Energetika Nazirliyinin mətbuat xidməti məlumat yayıb.
Məlumatda bildirilib ki, Qazaxıstan OPEC+ çərçivəsində əldə edilmiş razılaşmalara sadiq qalır və bu alyans çərçivəsində tərəfdaşlarla konstruktiv əməkdaşlığı davam etdirəcək, beynəlxalq öhdəliklərə və milli maraqlara əsaslanaraq fəaliyyət göstərəcək.
Eyni zamanda bildirilib ki, Qazaxıstan hasilatın bazara mərhələli qaydada qaytarılması cədvəlinin düzəlişini dəstəkləyib.
“Qazaxıstan həmçinin aprelin 3-də keçirilən görüşdə iştirak edib. Həmin görüşdə əlavə könüllü ixtisarlar həyata keçirən səkkiz ölkə, o cümlədən Qazaxıstan, bazar durumunu birgə qiymətləndiriblər. Görüşün nəticəsi olaraq, mövcud bazar şəraiti və sabitlik maraqları nəzərə alınaraq daha əvvəl razılaşdırılmış cədvələ düzəliş edilməsinə qərar verilib”, – deyə məlumatda bildirilib.
Qeyd edək ki, bu gün OPEC+ Birgə Nazirlər Monitorinq Komitəsinin (JMMC) 59-cu iclası videokonfrans formatında keçirilib.
İclasda bu ilin yanvar-fevral aylarında OPEC+ ölkələrinin saziş üzrə öhdəliklərinə əməl etməsi müzakirə olunub, ümumi icra səviyyəsi yüksək qiymətləndirilib və dünya neft bazarındakı tendensiyalar araşdırılıb.
“Komitə bazarın sabitliyinin qorunması məqsədilə səkkiz ölkənin həyata keçirdiyi əlavə könüllü ixtisarları yüksək qiymətləndirib və öhdəliklərə tam əməl olunmasının və kompensasiyanın təmin edilməsinin kritik əhəmiyyət daşıdığını vurğulayıb”, – deyə məlumatda qeyd olunub.
