Müharibə səbəbindən didərgin düşmüş 800 mindən çox livanlı evlərinə qayıdır - BMT

BMT bildirib ki, Livanda müharibə nəticəsində didərgin düşmüş 821 mindən çox insan evlərinə qayıtmağa başlayıb. Bununla belə, 360 mindən çox şəxs hələ də məcburi köçkün olaraq qalır və onların 26 minə yaxını dövlət sığınacaqlarında yaşayır. Məlumat Romada İsrail və Livan arasında ABŞ-nin vasitəçiliyi ilə keçirilən danışıqlar fonunda açıqlanıb. Livanın məlumatına görə, münaqişə nəticəsində 4 300-dən çox insan həlak olub.

5 Avqust 2026 18:37

BAKI,VOA,Yusif Şərifzadə

BMT Livanda müharibə nəticəsində didərgin düşmüş yüz minlərlə insanın İsrailin hücumlarının səngiməsindən sonra yaşadıqları ərazilərə qayıtmağa başladığını açıqlayıb.

VOA xəbər verir ki, məlumat İsrail və Livan nümayəndələrinin Romada ABŞ-nin vasitəçiliyi ilə keçirilən və cümə axşamınadək davam edəcək yeni danışıqlar mərhələsi fonunda yayılıb.

BMT-nin Humanitar Məsələlərin Əlaqələndirilməsi Ofisinin (OCHA) məlumatına görə, 30 iyul tarixinə olan vəziyyətə əsasən, 821 077 nəfər öz yaşayış yerlərinə qayıtmağa başlayıb.

Bununla yanaşı, 360 mindən çox insan hələ də məcburi köçkün vəziyyətində qalır. Onlardan təxminən 26 min nəfəri dövlət sığınacaqlarında yaşayır.

Məlumata görə, Hizbullah mart ayında İrana dəstək məqsədilə İsrailə raket zərbələri endirməklə Livanı ABŞ və İsrailin İranla müharibəsinə cəlb edib.

Livanın rəsmi məlumatına əsasən, İsrailin cavab olaraq həyata keçirdiyi genişmiqyaslı hava hücumları və quru əməliyyatları nəticəsində 4 300-dən çox insan həlak olub, yüz minlərlə sakin isə evlərini tərk etmək məcburiyyətində qalıb.