BAKI, VOA Orxan Qədirzadə
Liviyanın Dövlət Ali Şurası ölkənin şərqində 10 vətəndaşın edam edilməsindən narahatlığını bildirərək hökmlərin icrası ilə bağlı bütün hüquqi prosedurların araşdırılmasını tələb edib.
Şuranın açıqlamasında bildirilib ki, edam hökmlərinin icrası yalnız məhkəmə hakimiyyətinin səlahiyyətindədir və təqsirləndirilən şəxslərin saxlanılması, məhkəmə prosesi, müdafiə hüquqları və hökmün icrasına qədərki prosedurlar tam şəkildə qanunun tələblərinə uyğun olmalıdır.
Bu açıqlama Şərqi Liviyanın hərbi prokurorluğunun terror və digər ağır cinayətlərdə təqsirli bilinən 10 nəfərin güllələnərək edam edildiyini açıqlamasından sonra verilib. Hökmlərin çıxarılması ilə bağlı məhkəmə prosesinin bir neçə il davam etdiyi bildirilib.
Dövlət Ali Şurası məsələ ilə bağlı edam edilən şəxslərin adlarının, iş nömrələrinin, hökmləri çıxaran məhkəmələrin və məhkəmə prosesinin bütün mərhələlərinin açıqlanmasını istəyib.
Şura həmçinin edam hökmlərinin icrasını həyata keçirən qurumun hüquqi səlahiyyətlərinin yoxlanılmasını və analoji işlər üzrə saxlanılan şəxslərin təhlükəsizliyinin təmin edilməsini tələb edib.
Qurum digər edam hökmlərinin isə bütün hüquqi və məhkəmə prosedurlarının tam yoxlanılmasına qədər dayandırılmasına çağırıb. Bildirilib ki, məqsəd təqsirləndirilən şəxsləri müdafiə etmək deyil, dövlətin cəzalandırma səlahiyyətinin və ədalətli məhkəmə hüququnun qorunmasını təmin etməkdir.
