Bakı. AzerVoice:
Türkiyənin Aerokosmik Sənaye şirkəti (TUSAŞ) tərəfindən hazırlanan ANKA-3 pilotsuz döyüş təyyarəsi daha bir uçuşunu uğurla tamamlayıb.
Bu barədə AzerVoice-a Türkiyə hərbi mənbələrindən bildirilib.
Məlumata əsasən, PUA 8 min fut hündürlükdə, 150 knot sürətlə 1 saat 100 dəqiqəlik uçuş həyata keçirib.
Xatırladaq ki, TUSAŞ tərəfindən hazırlanan ANKA-3 pilotsuz döyüş təyyarəsi ötən il 28 dekabr tarixində ilk uçuşunu həyata keçirib.
Qeyd edək ki, maksimum uçuş çəkisi 6,5 ton olan ANKA-3, 1,2 ton faydalı yük daşıya biləcək. 40 min fut yüksəklikdə standart faydalı yükü ilə 10 saat uçuş müddəti olan ANKA-3, 250 kts kruiz sürətinə malikdir. Həm görmə daxilində, həm də kənarda rabitə ilə təchiz ediləcək ANKA-3 Pilotsuz Döyüş Təyyarəsi xüsusi dizaynı sayəsində çox aşağı radar kəsik sahəsinə malikdir. Şaquli dayanıqlığı olmayan “uçan qanad” şəklində olan ANKA-3-ün daxili silah stansiyaları da var ki, bununla da ANKA-3 düşmən radarlarına görünmədən düşmən ərazisinin dərinliklərində “dərin zərbə” adlanan döyüş tapşırıqlarını yerinə yetirə biləcək.
