Bakı. AzerVoice:
Bölgədə 100-dən çox çadırın qurulmasında bir başa iştirak etmişik. Bu barədə AzerVoice-ə, Türkiyəyə yardıma gedən Azərbaycan Könüllüsü Rəsul İsmayılzadə deyib.
“Qardaş ölkə Türkiyədə baş vermiş zəlzələ hər birimizi dərindən sardı. İlk gündən etibarən Azərbaycandan yardımların hazırlanmasında iştirak etdik. Daha sonra isə 100 nəfərlik könüllü heyəti ilə Türkiyənin Kahramanmaraş vilayətinə, humanitar yardım göstərməyə getdik. Bölgələrdə yardımların paylanılması, zəlzələdən əziyyət çəkənlərə psixoloji dəstəyin göstərilməsi, qidaların, paltarların paylanmasında aktiv şəkildə iştirak etdik.” - deyə o bildirib.
Rəsul İsmayılzadə qeyd edib ki, Kahramanmaraş ilə yanaşı, Adıyaman, Hatay, Malatya bölgələrinə də səfərlər edilib.
“Çadır heyəti olaraq Hatay bölgəsində də fəaliyyət göstərmişik. Bundan əlavə olaraq Azərbaycan tərəfindən göndərilən çadırların qurulmasını bölgədəki türk gənc könüllülərə də öyrədirdik. Yaşanan hadisələr bizim üçün çox çətin bir təcrübə oldu. Lakin biz hər zaman qardaşlarımıza dəstək olmağa hazırıq.” - deyə o bildirib.
Xatırladaq ki, fevralın 6-da Türkiyədə səhər saatlarında 7.7 və 7.6 bal gücündə iki zəlzələ baş verib. Dərinliyi 7 kilometr olduğu müəyyən edilən zəlzələ Hatay, Qaziantep, Kilis, Osmaniye, Malatya, Adıyaman, Şanlıurfa, Diyarbəkir, Adana və Kahramanmaraş vilayətlərində ciddi dağıntılara səbəb olub.
"Bir yumruq, bir ürək, bir can" şüarını rəhbər tutaraq qardaş ölkədə zəlzələ bölgələrində bu fəaliyyəti Azərbaycan Könüllüləri həm müddət, həm də say baxımından mütəşəkkil formada ölkəmizdən kənarda humanitar yardım istiqamətində təşkil olunmuş ilk könüllü fəaliyyəti kimi tarixə düşüb. Azərbaycanlı könüllülər zəlzələ bölgəsində çox çətin şəraitin olmasına, dağılmış ərazilərə yetişməyin çətinliklərinə baxmayaraq, uzun yol qət edərək, zəlzələdən zərərçəkənlərin köməyinə çatıb.
Hafiz Rufizoğlu
