BAKI, AzerVoice

Livan dövləti, Suriya sərhədində baş verən qarşıdurmaların gərginliyi artırmasından sonra vəziyyəti sabitləşdirmək üçün təcili tədbirlər görməyə başlayıb. Baş verən silahlı toqquşmalarda hər iki tərəfdən ölənlər olub.

Livan Prezident Administrasiyasının verdiyi açıqlamada bildirilib ki, Prezident Cozef Aun, hazırda Brüsseldə "Suriya Gələcəyinə Dəstək" adlı Avropa İttifaqının təşkil etdiyi konfransa qatılan Xarici İşlər Naziri Yusuf Raci ilə əlaqə saxlayıb. Prezident ondan Suriyalı nümayəndə heyəti ilə əlaqə yaradaraq problemin ən qısa zamanda həll olunmasını, iki ölkənin suverenliyinin qorunmasını və vəziyyətin daha da pisləşməsinin qarşısının alınmasını təmin etməyi tələb edib.

Prezident Aun sərhədin şərq və şimal-şərq bölgələrində baş verən hadisələrin davam etməsinin qəbuledilməz olduğunu bildirib. O, hadisələri gecə saatlarından etibarən yaxından izlədiyini, vəziyyətin hər an yenilənən hesabatlarını aldığını və ordunun silahlı hücumlara cavab verməsi üçün göstəriş verdiyini vurğulayıb.

Sərhəd Təhlükəsizliyi və Hökumətin Yeni Addımları

Livan hökumətinin yeni baş naziri Navaf Salam ilk dəfə baş nazir kimi kabinet iclasına sədrlik etdi. Daha əvvəl iclaslara Prezident Aun rəhbərlik edirdi. İclasda sərhədlərin qorunması və qaçaqmalçılığın qarşısının alınması üçün yeni tədbirlərin müzakirə edildiyi bildirildi.

İnformasiya Naziri Pol Markusun açıqlamasına görə, iclasın əsas nəticələrindən biri sərhədlərin daha effektiv nəzarətə alınması üçün yeni nazirlər komitəsinin yaradılması olub. Bu komitəyə daxili işlər, müdafiə, maliyyə, nəqliyyat və ədliyyə nazirləri daxil edilib.

Müdafiə Naziri Mişel Mənsinin məlumatına görə, son toqquşmalarda 3 suriyalı qaçaqmalçı öldürülüb və onların cəsədləri Qırmızı Xaç vasitəsilə Suriya hakimiyyətinə təhvil verilib.

Baş nazir Navaf Salam, Suriya hakimiyyəti ilə daha effektiv koordinasiya tələb edərək vurğulayıb ki, Suriya tərəfində gözlənilməz silahlı hücumların qarşısının alınması üçün lazımi addımlar atılmalıdır. Salam bildirib ki, Livan ordusu Suriyadan açılan atəşə cavab vermək məcburiyyətində qalır və bu da gərginliyin artmasına səbəb olur.

Salam əlavə edib ki, son insidentlər nəticəsində bir uşaq həlak olub, 6 nəfər yaralanıb və çox sayda mülki əhali evlərini tərk etməyə məcbur qalıb.

Sərhədlərin Qorunması üçün Yeni Tədbirlər

İnformasiya Naziri Markusun sözlərinə görə, Suriya ilə koordinasiya səviyyəsinin artırılması üçün müvafiq nazirlərə göstərişlər verilib.
Nazirlər komitəsi sərhəd təhlükəsizliyi ilə bağlı bu əsas tədbirləri təklif edəcək:

Sərhəddə nəzarətin gücləndirilməsi və Livan-Suriya arasında daha sıx əlaqələrin qurulması.
Qaçaqmalçılığın qarşısının alınması üçün daha ciddi tədbirlərin görülməsi.
Sərhəd bölgəsində hərbi mövcudluğun artırılması və lazımi müdafiə addımlarının atılması. Sərhəd pozuntularının araşdırılması və mümkün diplomatik həll yollarının tapılması.

Hizbullah və Parlamentin Reaksiyası

Hizbullahın parlament fraksiyasının üzvü, millət vəkili Əli Məqdə bildirib ki, Parlamentin sədri Nəbih Bərri, Livan ordusuna sərhədlərin əsas qoruyucusu olmaq üçün təlimat verdiyini bildirib.

Məqdə, sərhəddə gərginliyin son 3 ayda davam etdiyini və son hücumun Livan torpaqlarına ciddi təsir etdiyini vurğulayıb.

“Livan torpaqları və evləri birbaşa hədəfə alınıb. 14 yaşlı bir uşaq həlak olub, çox sayda mülki vətəndaş yaralanıb. Livanın şimal-şərq sərhədi boyunca 130 mindən çox insan Suriya torpaqlarından qaçqın kimi çıxarılıb”-deyə o bildirib.

Məqdə bildirib ki, bu məsələyə uzunmüddətli həll tapılmalı və Livan torpaqlarından didərgin düşmüş insanların geri qayıtması təmin edilməlidir.