BAKI,AzerVoice Analitik Təhlil Mərkəzi
Livan Prezidenti Aparatının Mətbuat Xidməti son günlərdə bəzi yerli media orqanlarında və sosial şəbəkələrdə ərəb ölkələrinə qarşı yayımlanan tənqid və təhqir xarakterli materiallara qarşı sərt reaksiya verdi. Bəyanatda jurnalistlər milli, hüquqi və etik məsuliyyətə çağırıldı, xüsusilə dost və qardaş ərəb ölkələrinə qarşı təxribat xarakterli informasiyalardan çəkinməyə çağırış edildi.
İTTİHAMLAR "MÜQAVİMƏT" MEDİASINA , YƏNİ HİZBULLAHA
YÖNƏLİR
Ad çəkilməsə də, bəyanatın hədəfi, açıq şəkildə İran yönümlü
"müqavimət mediası" idi. Bu media qurumları
Livanla ərəb ölkələri arasında son vaxtlar müşahidə olunan siyasi
yaxınlaşmanı pozmaq üçün fəaliyyətdə ittiham olunur. Xüsusilə də
Hizbullahın silahsızlaşdırılması və dövlətin suverenliyi
istiqamətindəki çağırışların gücləndiyi bir dövrdə bu media
vasitələrinin ərəb ölkələrini hədəf alması təsadüfi sayılmır.
SİLAH MƏSƏLƏSİ ƏTRAFINDA YENİ
GƏRGİNLİK
Mənbələrə əsasən, Livanda Hizbullahın silahlarının dövlətin
nəzarətinə verilməsi mövzusu yenidən aktuallaşıb. Bu çağırışlar,
Prezident Cozef Aunun seçilməsi və Nəvvaf Salamın hökumət başçısı
təyin olunması ilə paralel olaraq artıb. Hizbullah isə bu
prosesə media üzərindən cavab verir, ərəb ölkələrinə yönəlik tənqid
və ittihamları gücləndirir.
“SİLAHIN SƏNİ QORUYUR” – YENİ PROPAGANDA
KAMPANİYASI
Hizbullaha bağlı “Əl-Manar” televiziyası yeni
vizual kampaniya başladıb: “Silahın atındır – onu qorusan, o da
səni qoruyar”. Şüar altında hazırlanan posterlər, sosial media
paylaşımları və açıq təbliğatlar, beynəlxalq ictimaiyyətin
silahsızlanma tələblərinə qarşı çıxış kimi qiymətləndirilir.
SİYASİ LİDERLƏRİN MÜDAFİƏSİ VƏ MEDİA
HÜCUMLARI
Hizbullahın tanınmış simalarından olan deputat Həsən
Fəzzullah medianı hədəfə alaraq, silahsızlanma mövzusunda
yayılan məlumatları "təxribat və psixoloji
müharibə" adlandırıb. Hizbullahın əlaqə və koordinasiya
bölməsinin rəhbəri Vəfiq Safa isə çıxışında deyib:
“Silahsızlanma yalnız sosial şəbəkələrdəki
spekulyasiyalarda var.” Onun fikrincə, bu mövzu yalnız
İsrailin Livan ərazisindən tam çəkilməsi və orduya dəstək
strategiyası qurulduqdan sonra müzakirə edilə bilər.
HİZBULLAH RƏHBƏRLİYİNDƏN
HƏDƏLƏR
Hizbullahın Siyasi Şurasının sədr müavini Mahmud Qamati isə bir
qədər də sərt çıxış edərək “müqavimət silahına uzanan hər
əli kəsəcəyik” deməklə dolayısıyla silah məsələsini
müzakirə edənlərə qarşı açıq təhdid ifadə edib. Daha sonra bu
ifadələrinin silahsızlanmanı dəstəkləyənlərə yönəldiyini
açıqlayıb.
MƏDİA ÜZƏRİNDƏ DAİMİ
TƏZYİQLƏR
Fevral ayında da Hizbullah deputatı İbrahim Musəvi
“Əl-Manar” kanalına verdiyi müsahibədə Livan
mediasını “vəziyyəti düzgün təqdim etməməkdə” ittiham etmiş, bəzi
telekanalları “düşmənin təbliğatına xidmət etməkdə” suçlamışdı.
Xüsusilə Cənub bölgəsindəki dağıntıların işıqlandırılmasını
“müqavimətin nüfuzuna zərbə” kimi qiymətləndirmişdi.
DAXİLİ MÜQAVİMƏTƏ MESAJ VERMƏK
CƏHDİ
Siyasi təhlilçilərə görə, bu media hücumları əslində Hizbullahın
daxili auditoriyasına ünvanlanmış mesajlardır. Çünki partiya artıq
beynəlxalq və regional səviyyədə silahsızlanmanın qaçılmaz
olduğunun fərqindədir. Ona görə də hazırda baş verənlər “daxili
auditoriyanı psixoloji olaraq bu reallığa hazırlamaq” üçün atılan
addımlar kimi şərh edilir.
Ərəb dünyasının Livanla əlaqələrini normallaşdırmaq səyləri davam edir. Prezident Cozef Aun və Baş nazir Nəvvaf Salam bu istiqamətdə konstruktiv dialoqu dəstəkləyirlər. Hizbullah isə dəyişən geosiyasi reallıqlar qarşısında, öz varlığını qorumaq məqsədilə informasiya cəbhəsində mövqe sərtləşdirməyə üstünlük verir. Lakin dövlətin suverenliyi və beynəlxalq təzyiqlər fonunda Hizbullahın silahlarının nəzarət altına alınması məsələsi artıq yalnız daxili müzakirə deyil, regional təhlükəsizlik gündəminin ayrılmaz hissəsinə çevrilib.
