BAKI, AzerVoice

İran ABŞ-ın nüvə obyektlərinə qarşı həyata keçirdiyi hərbi hücumların beynəlxalq hüququ pozduğunu bildirərək, Atom Enerjisi üzrə Beynəlxalq Agentliyə (AEBA) rəsmi müraciət ünvanlayıb.

AzerVoice-un məlumatına görə,bu barədə İran Atom Enerjisi Təşkilatının (İAET) rəhbəri Məhəmməd Eslaminin AEBA-nın baş direktoru Rafael Qrossiyə göndərdiyi məktubda qeyd olunub. Məktubda Tehran ABŞ-ın Nətənz, Fordo və İsfahan nüvə obyektlərinə yönəltdiyi zərbələrin Nüvə Silahlarının Yayılmaması Sazişi (NPT) və digər beynəlxalq mexanizmləri pozduğunu bildirib.

İran tərəfi AEBA rəhbərliyini fəal mövqe nümayiş etdirməyə, ABŞ-ın bu hərəkətini qınamağa və müvafiq beynəlxalq addımlar atmağa çağırıb. Eslami həmçinin vurğulayıb ki, hücumlar BMT Təhlükəsizlik Şurasının daimi üzvü olan ABŞ tərəfindən həyata keçirilib və bu, BMT Nizamnaməsinin müddəalarına ziddir.

İran Atom Enerjisi Təşkilatı bəyan edib ki, beynəlxalq hüququn pozulmasına susmaq, bu tip təcavüzlərin legitimləşməsinə səbəb ola bilər.

Qeyd edək ki, ötən gecə ABŞ Hərbi Hava Qüvvələri İranın üç əsas nüvə obyektinə – Nətənz, Fordo və İsfahana – hava zərbələri endirib. Rəsmi Vaşinqton bu hücumun İranın nüvə proqramını sıradan çıxarmağa yönəldiyini bildirib.