BAKI, AzerVoice
Küveyt və Bəhreyn ABŞ-ın hücumlarından sonra fövqəladə hazırlıq rejiminə keçib.
AzerVoice xəbər verir ki, ABŞ-ın
İrandakı üç nüvə obyektinə hava zərbələrindən sonra Körfəz ölkələri
təhlükəsizlik tədbirlərini gücləndirib.
Küveyt və Bəhreyn “fövqəladə hallar” rejiminə uyğun addımlar ataraq
regional gərginliyə qarşı tədbirlər planını tətbiq edib.
Küveytin Ali Müdafiə Şurası daimi iclas formatına keçərək ölkənin fövqəladə vəziyyətlərə hazırlıq səviyyəsini artırmaq qərarına gəlib. Bu çərçivədə nazirlik kompleksi binasında sığınacaqların hazırlanması və müxtəlif məkanlarda təcili logistika anbarlarının ayrılması nəzərdə tutulub.
Bəhreyn isə dövlət idarələrinin 70 faizinin uzaqdan işləməsinə şərait yaradıldığını bildirib. Bu qərar, yalnız ictimai təhlükəsizlik və fövqəladə prosedurlarla əlaqəli sektorları istisna edir. Eyni zamanda, Təhsil Nazirliyi dövlət və özəl təhsil müəssisələrinə rəqəmsal tədris platformalarının aktivləşdirilməsi barədə göstəriş verib.
Səudiyyə Ərəbistanı, BƏƏ və Körfəz Əməkdaşlıq Şurası isə yayımladıqları birgə açıqlamada bölgədə ekoloji və radioloji göstəricilərin təhlükəsiz və texniki cəhətdən icazə verilən səviyyədə qaldığını təsdiqləyiblər.
Qeyd edək ki, ABŞ-ın İrandakı Fordo, Natanz və İsfahan nüvə obyektlərinə endirdiyi hava zərbələri regionda narahatlıq yaradıb. İran hələlik ciddi radioloji sızma olmadığını bildirsə də, bölgə ölkələri ehtiyat tədbirlərini artırmaqdadır.
