BAKI, AzerVoice
Kanada və Avstraliya hökumətləri cümə günü İsrailin Qəzza zolağında baş verən humanitar böhranla bağlı hərəkətsizliyinə sərt reaksiya veriblər.
AzerVoice xəbər verir ki, Kanadanın Baş naziri Mark Karni İsrailin Kanadanın maliyyələşdirdiyi humanitar yardımların müharibədən zərər çəkmiş Qəzza sakinlərinə çatdırılmasına maneə yaratdığını bildirərək, bunun beynəlxalq hüququn pozulması olduğunu qeyd edib.
O, sosial media platforması "X" üzərindən paylaşımında
deyib:
"Kanada bütün tərəfləri dərhal və xoş niyyətlə atəşkəsə dair
danışıqlara başlamağa çağırır. HƏMAS-ı bütün girovları dərhal azad
etməyə, İsrail hökumətini isə Qəzza və İordan çayının qərb
sahilində ərazi bütövlüyünə hörmət etməyə çağırırıq."
Oxşar tonda çıxış edən Avstraliyanın Baş naziri Entoni Albanizi də cümə günü yaydığı bəyanatda bildirib ki, Qəzza sakinlərinin həyatı, aclığı və əzabı qarşısında mümkün olan bütün tədbirlər görülməlidir.
“İsrailin yardım girişini əngəlləməsi və mülki şəxslərin, o cümlədən uşaqların öldürülməsi nə qəbul edilə bilər, nə də müdafiə edilə bilər”, – deyə o əlavə edib.
Hər iki lider İsrailin hərbi əməliyyatlarının səbəb olduğu humanitar böhran fonunda beynəlxalq ictimaiyyəti daha sərt mövqe tutmağa çağırıblar.
