BAKI, AzerVoice – Niderland hökuməti, İsrailin radikal sağçı nazirləri İtamar Ben-Qvir və Betsalel Smotriçə ölkəyə giriş qadağası tətbiq edib. AzerVoice xəbər verir ki, qadağaya səbəb olaraq onların fələstinlilərə qarşı zorakılığı təşviq etməsi və Qəzzada "etnik təmizləmə" çağırışları göstərilib.
Niderland hökuməti İsrailin Haaqadakı səfirini ölkə Xarici İşlər Nazirliyinə çağıraraq, Qəzzada yaranmış vəziyyəti “dözülməz və müdafiəolunmaz” adlandırıb.
Niderlandın xarici işlər naziri Kaspar Valdikamp Niderland parlamentinə ünvanladığı məktubda bildirib:
“Bu addım Ben-Qvir və Smotriçin fələstinli əhaliyə qarşı zorakılığı təhrik etmələri və Qəzza zolağında etnik təmizləmə çağırışları ilə bağlıdır.”
Ben-Qvir: “Avropaya girişim qadağansa da, HƏMAS-ın süqutu üçün çalışacağam”
Qadağaya münasibət bildirən İsrailin milli təhlükəsizlik naziri İtamar Ben-Qvir “X” (keçmiş “Twitter”) platformasında yazaraq bildirib ki, “Avropanın bütün ölkələrinə girişim qadağan edilsə belə, ölkəm üçün mübarizə aparacaq, HƏMAS-ın məhvini və döyüşçülərimizin dəstəyini davam etdirəcəyəm.”
Niderlandın bu addımı, baş nazir Dik Şofun İsrailə qarşı “ölkə səviyyəsində tədbirlərin nəzərdən keçirildiyini” açıqlamasından bir gün sonraya təsadüf edir. Haaqa, eyni zamanda Avropa İttifaqının İsrailli tədqiqatçıların maliyyələşdirilməsinin qismən dayandırılması təklifini dəstəklədiyini bildirib.
Hökumət əlavə edib ki, əgər İsrail Avropa İttifaqı ilə yardım müqaviləsini pozarsa, Niderland Avropa səviyyəsində ticarət sanksiyalarının tətbiqi üçün təzyiq göstərəcək.
Digər Qərb ölkələri də bənzər tədbirlər görüb
Niderlandın qərarı, ötən ay oxşar addımlar atan Böyük Britaniya, Kanada, Avstraliya, Yeni Zelandiya və Norveçin mövqeyi ilə üst-üstə düşür. Bu ölkələr də radikal sağçı israilli siyasətçilərin fələstinlilərə qarşı açıqlamalarına sərt reaksiya vermişdi.
