BAKI, AzerVoice, Səməd Əyyubov – Suriyanın cənubunda yerləşən Süveyda vilayətində baş verən toqquşmalar səbəbindən Busrə əş-Şam humanitar dəhlizi bağlanıb.
AzerVoice xəbər verir ki, bu barədə Suriyanın “Əl-İxbariyyə” telekanalı ölkənin Daxili İşlər Nazirliyindəki mənbəyə istinadən məlumat yayıb.
Mənbənin bildirdiyinə görə, atəşkəs rejiminin qanunsuz silahlı qruplar tərəfindən pozulmasından sonra bölgədə təhlükəsizlik təmin olunana qədər dəhliz bağlı qalacaq.
Qeyd edək ki, bugün Süveyda şəhərinin qərbində şiddətli qarşıdurmalar yenidən başlayıb. Ət-Taalə bölgəsində druz icmasının dəstələri ilə təhlükəsizlik qüvvələrinin dəstəklədiyi ərəb tayfalarından olan döyüşçülər arasında atışmalar baş verib, qumbaraatanlardan istifadə olunub.
Toqquşmalar, druz silahlılarının Təl-Hədid kəndi yaxınlığında hökumət qüvvələrinin mövqelərinə hücum etməsindən sonra daha da kəskinləşib. “Əl Cəzirə” telekanalının məlumatına əsasən, bu hücum nəticəsində beş təhlükəsizlik əməkdaşı həlak olub.
Süveyda vilayətində qarşıdurmalar ilk dəfə iyulun 13-də druzlar ilə ərəb tayfalarından olan silahlı dəstələr arasında baş vermişdi. İyulun 15-də Suriya Daxili İşlər və Müdafiə nazirliklərinin xüsusi bölmələri vilayətin inzibati mərkəzinə daxil olaraq bölgədə sabitliyi bərpa etmək məqsədilə təmizləmə əməliyyatlarına başlamışdı. İyulun 19-da isə Suriya prezidenti Əhməd əş-Şəraa beynəlxalq vasitəçilərin iştirakı ilə hazırlanmış sülh planına əsasən Süveyda vilayətinin bütün ərazisində atəşkəs rejiminin tətbiq olunduğunu elan etmişdi.
