BAKI, AzerVoice, Zeynəb Raminqızı
Netanyahu Qəzzada atəşkəs və məhbusların azad olunmasını nəzərdə tutan təklifləri rədd edib.
AzerVoice xəbər verir ki, bu barədə İsrail mediası məlumat yayıb. Kanal 13 televiziyası tərəfindən yayımlanan gizli sənədlərə əsasən, Netanyahu hökuməti təhlükəsizlik və kəşfiyyat rəsmilərinin dəstəklədiyi hərtərəfli razılaşmaya qarşı çıxıb.
Məlumata görə, Qəzzada müharibənin dayandırılması və israilli məhbusların azad edilməsi məqsədilə keçirilən gizli toplantıda təhlükəsizlik qurumlarının rəhbərləri razılaşmanı dəstəkləyib. Onlar müharibənin sonlandırılmasının mümkün olduğunu və lazım gələrsə hərbi əməliyyatların yenidən başlaya biləcəyini bildiriblər. Lakin Netanyahu bu təklifləri rədd edib.
İsrailli məhbus ailələrinin nümayəndəliyi yayılan sənədlərin hərtərəfli razılaşmanın mümkünlüyünü sübut etdiyini açıqlayıb. Ailələr hökuməti prosesi bilərəkdən pozmaqda və ictimaiyyəti aldatmaqda ittiham edib. Onların bildirdiyinə görə, razılaşmanın pozulmasından sonra 50 israilli əsgər həlak olub və heç bir hərbi nailiyyət əldə edilməyib.
HƏMAS da məsələ ilə bağlı bəyanat verərək, bütün israilli məhbusları azad etməyə hazır olduğunu, lakin bunun üçün İsrailin Qəzzadan tamamilə çıxması və müharibəyə son qoyması lazım olduğunu bildirib.
Qeyd edək ki, tərəflər arasında 24 noyabr 2023-cü ildə ilk humanitar atəşkəs razılaşması qüvvəyə minib. 19 yanvar 2024-cü ildə başlayan ikinci mərhələ çərçivəsində 1700-dən çox fələstinli məhbus azad edilib, HƏMAS isə 33 israilli məhbusu təhvil verib. Atəşkəsin 42 günlük ilk mərhələsi 2 martda başa çatıb. Bundan sonra İsrail danışıqlarda irəliləyişə imkan verməyib və 18 martda Qəzzaya qarşı hərbi əməliyyatları bərpa edib.
Məlumatlara görə, İsrail tərəfi əsas məsələlərdə – Qəzzadan çəkilmək, müharibəyə son qoymaq və hərtərəfli razılaşmaya getmək kimi şərtlərdə güzəştə getməkdən imtina etdiyi üçün Qətərdə aparılan dolayı danışıqlar da nəticəsiz qalıb.
