BAKI, AzerVoice, Səməd Əyyubov – İsrailin Baş naziri Benyamin Netanyahu bildirib ki, ölkəsi Qəzza zolağını idarə etmək niyyətində deyil və bu ərazinin nəzarətini bölgədə təhlükə yaratmayan və yerli əhaliyə yaxşı həyat təmin edə biləcək ərəblərdən ibarət qüvvələrə vermək istəyir.
AzerVoice-un məlumatına görə, bu barədə Netanyahu Netanyahu “Fox News” telekanalına müsahibəsində danışıb.
“Biz Qəzzanı idarə etmək istəmirik. Bu ərazini bizə qarşı təhdid yaratmayan və Qəzza sakinlərinə yaxşı həyat təmin edə bilən ərəblərə təhvil vermək niyyətindəyik” – deyə, o qeyd edib.
O əlavə edib ki, İsrail Qəzza üzərində birbaşa nəzarətə maraqlı deyil, lakin ölkənin təhlükəsizliyini təmin etmək üçün “təhlükəsizlik perimetri” yaradılmasında israrlıdır.
Netanyahu bu planın yalnız HƏMAS hakimiyyətinə son qoyulduqdan sonra reallaşa biləcəyini vurğulayıb.
Qeyd edək, İsrail ordusu yanvar ayında qüvvəyə minmiş atəşkəsdən sonra martın 18-də Qəzza zolağına qarşı hərbi əməliyatlara yenidən başlayıb.
İsrailin 2023‑cü il oktyabrın 7-dən bəri Qəzzaya endirdiyi zərbələr nəticəsində azı 61 min 158 fələstinli həlak olub, 151 min 442 nəfər yaralanıb.
İsrailin mart ayında atəşkəsi pozduqdan sonra həyata keçirdiyi hücumlarda isə 9 min 654 nəfər öldürülüb, 39 min 401 nəfər yaralanıb.
Mayın 27-dən bəri isə İsrail və ABŞ-ın təşkilatçılığı ilə “Qəzza Humanitar Yardım Fondu” adı altında yaradılan paylama məntəqələrində fələstinlilərə qarşı həyata keçirilən hücumlar nəticəsində ölənlərin sayı 1 655-ə, yaralıların sayı isə 11 min 800-ə çatıb.
