BAKI, AzerVoice, Səməd Əyyubov
İsrail ordusu Livanın cənubundakı Şəkif təpəsi bölgəsində Hizbullaha məxsus hərbi infrastruktur və yeraltı obyektləri hava zərbələri ilə hədəf alıb.
AzerVoice xəbər verir ki, ordunun mətbuat xidmətinin yaydığı məlumata görə, hücumlar bölgədə müşahidə edilən hərbi fəaliyyətlərdən sonra həyata keçirilib. İsrail tərəfi bu obyektlərin mövcudluğunu İsrail–Livan razılaşmalarının pozulması kimi qiymətləndirib.
Ordudan verilən açıqlamada bildirilib ki, ölkənin təhlükəsizliyinə yönəlmiş hər hansı təhdidin qarşısını almaq üçün əməliyyatlar davam etdiriləcək. İsrail ordusunun sözçüsü Avixay Edri də ötən gün Livanın cənubunda Hizbullaha aid bir neçə hədəf, o cümlədən yeraltı tunellərin vurulduğunu açıqlayıb. O da bu infrastrukturu razılaşmaların pozuntusu kimi dəyərləndirib və əməliyyatların davam edəcəyini vurğulayıb.
Qeyd edək ki, ötən ilin noyabrından etibarən, İsrail ilə Hizbullah arasında ilyarımdan çox davam edən münaqişəni dayandırmaq məqsədilə Livanda atəşkəs qüvvədədir. Lakin İsrail, xüsusilə cənub bölgələrdə, tez-tez hava hücumları həyata keçirərək Hizbullah üzvlərini və infrastrukturunu hədəf aldığını bildirir.
