BAKI, AzerVoice, Səməd Əyyubov
İsrailin baş naziri Benyamin Netanyahu bildirib ki, hətta HƏMAS razılaşmaya razılıq versə belə, İsrail ordusu Qəzzaya nəzarəti ələ alacaq.
AzerVoice xəbər verir ki, o, bu barədə “Sky News” telekanalına müsahibəsində danışıb.
“Biz bunu hər halda edəcəyik, bunda heç bir şübhə yoxdur. HƏMAS Qəzzada qalmayacaq. Müharibənin sonuna yaxınlaşırıq. Bu, İran və onun vasitəçilərini də əhatə edən yeddi cəbhədə aparılan müharibədir” – deyə Netanyahu qeyd edib.
Baş nazir həmçinin bildirib ki, “əgər HƏMAS silahını yerə qoysa və əsirləri azad etsə, Qəzzadakı müharibə bu gün bitə bilər.”
İsrail ordusunun sözçüsü isə açıqlamasında bildirib ki, ordu həkimlər və beynəlxalq təşkilatlarla koordinasiya quraraq Qəzza şəhərinin sakinlərinə cənuba köçmək barədə xəbərdarlıqlar etməyə başlayıb.
Son saatlarda İsrail ordusunun intensiv hava zərbələri Qəzza şəhəri və ətraf əraziləri hədəf alıb. Bu hücumlar ordunun şəhərə nəzarəti ələ almaq üçün ilkin əməliyyatlara başladığını açıqlamasından cəmi bir gün sonra baş verib.
Xatırladaq ki, İsrail çərşənbə günü Qəzza şəhərinə nəzarəti təmin etmək məqsədilə hərbi planı təsdiqləyib və 60 min ehtiyat hərbçini xidmətə çağırıb. İki milyondan çox insanın yaşadığı Qəzza zolağında ağır humanitar böhranın daha da dərinləşdiyi bir vaxtda, hökumətin günün sonuna qədər şəhərdə əməliyyatı rəsmən təsdiqləməsi gözlənilir.
